1耶穌喊十二個學生來，賜佢等逐邪靈㧯醫各種病个權柄。
2這十二個使徒个名：頭一個安到西門 (偏名彼得)，還有厥老弟安德烈，西庇太个孻仔雅各，㧯雅各个老弟約翰；
3又有腓力㧯巴多羅買；多馬㧯稅務員馬太；亞勒腓个孻仔雅各㧯達太；
4激進黨个西門㧯出賣耶穌个加略人猶大。
十二使徒个使命(馬可 6:7-13；路加 9:1-6)5耶穌派這十二個使徒出去，吩咐佢等講：「莫去外邦人个地方，莫入撒馬利亞人个城市。
6你等愛去以色列人失落个羊群該位。
7去到逐所在，愛宣傳講：『天國會實現了！』
8你等愛醫好病人，喊死人復活，使發癩个人淨浰，並逐鬼。你等係白白得到个，也愛白白給人。
9錢袋仔毋好帶金、銀、銅錢；
10出去毋好帶旅行袋抑係加帶一領內衫，也毋好帶鞋㧯柺棍仔。因為工人得到供給係應當个。
11「你等去到一個城市抑係村莊个時，愛先打探在該位有麼人堪得接待你等，就去住在厥屋下，直到你等離開該地方。
12你等入去人屋下个時，愛講：『願你等平安。』
13若係該家人堪得接待你等，你等為佢等求个平安就會臨到該家庭。若係佢等堪毋得，你等就收轉你等个祝福。
14該毋歡迎你等、毋聽你等話个家庭抑係城市，你等就離開該位，將腳項个泥粉蹬掉。
15𠊎實在㧯你等講，在審判該日，所多瑪㧯蛾摩拉所受个責罰，會比該城市所受个輕盡多！」
將來个迫害(馬可 13:9-13；路加 21:12-19)16「你等愛聽好！𠊎派你等出去，像送羊入狼群一樣。所以，你等愛像蛇恁精靈，像月鴿仔恁溫柔。
17愛細膩，因為有人會捉你等，送你等上法院，也會在佢等个會堂鞭打你等。
18為到𠊎个緣故，你等會被人送到統治者㧯君王个面前去受審判，來對佢等㧯外邦人做見證。
19你等受審問个時，毋使愁愛講麼介話，抑係愛樣般回答；到該時，上帝會指示你等應當講个話。
20因為你等所愛講个，毋係自家个話，係你等天父个靈愛通過你等講个。
21「兄弟會出賣兄弟來害死佢等；阿爸也會恁樣對待子女；子女也會同爺𡟓作對來害死佢等。
22為到𠊎，大家會怨恨你等；總係忍耐到底个人定著會得救。
23佢等若係在這城肚迫害你等，你等就逃走去別个城。𠊎實在㧯你等講，以色列个城市你等還吂行透，人子就會到。
24「學生無比先生較大，奴僕也無比主人較大。
25因為恁樣，學生所堵到个㧯先生共樣，奴僕所堵到个㧯主人共樣，就愛知足。若係一家之主被人看做鬼王別西卜，屋下其他个人敢毋係愛受還較大个侮辱嗎？
所愛驚个(路加 12:2-7)26「所以，毋使驚麼人；一切遮等个事有一日會變做公開，祕密个事也會被人知到。
27𠊎在暗中㧯你等講个，你等愛在光天白日之下講出來；你等私下聽到个，愛在屋頂宣佈出來。
28只有㓾死肉體、無法滅靈魂个，毋使驚佢等；所愛驚个係上帝，只有佢正能將人个肉體㧯靈魂全部㧒落地獄去。
29兩隻屋簷鳥仔雖然正賣一角銀，總係你等个天父若毋肯，一隻也毋會跌下地泥來。
30連你等个頭那毛逐條佢乜算過囉！
31所以，毋使驚，你等比一大群个屋簷鳥仔加盡貴重！
認基督抑係毋認(路加 12:8-9)32「在人个面前認𠊎个，在𠊎天父个面前𠊎也愛認佢；
33在人个面前毋認𠊎个，在𠊎天父个面前𠊎也毋認佢。
耶穌所帶來个分裂(路加 12:51-53；14:26-27)34「毋好恅到𠊎來係帶給世間和平；𠊎所帶來个並毋係和平，反轉係刀劍。
35𠊎來係愛使
孻仔反對厥爸，
妹仔反對厥姆，
心舅反對家娘。
36人个對敵就係佢屋下个人。
37「敬愛爺𡟓贏過敬愛𠊎个，堪毋得做𠊎个學生；惜子女贏過敬愛𠊎个，堪毋得做𠊎个學生；
38毋肯擎自家个十字架來跈𠊎个，也堪毋得做𠊎个學生。
39想愛保全自家生命个人，反轉會喪失生命；為到𠊎喪失生命个，反轉會得到生命。
論獎賞(馬可 9:41)40「接待你等个，就係接待𠊎；接待𠊎，就係接待該差𠊎來个。
41因為某人係上帝个使者就接待佢个，定著會得到愛賞給使者共樣个獎賞；因為某人係義人就接待佢个，一定會得到愛賞給義人共樣个獎賞。
42𠊎實在㧯你等講，無論係麼人，就算拿一杯冷水給最微細个一儕啉，只係因為這儕係𠊎个學生，就一定會得到獎賞。」
Who We AreWhat We EelieveWhat We Do
2025 by iamachristian.org,Inc All rights reserved.
