民數記 9 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

第二個𨃟過節

1 以色列人離開埃及後个第二年正月，上主在西奈曠野對摩西講：

2-3「本月十四，對日頭落山開始，以色列人愛遵照所有个規定㧯條例來守𨃟過節。」

4所以摩西吩咐人民守𨃟過節。

5正月十四臨暗仔，佢等在西奈曠野守𨃟過節。上主所命令摩西一切个話，以色列人全部遵行。

6總係，有幾個人因為憑到屍體就無淨浰，做毋得在該日守𨃟過節。佢等到摩西、亞倫面前，

7講：「𠊎等因為憑到屍體就無淨浰；總係做麼介不准𠊎等㧯其他个以色列人共下在指定个日仔獻祭物給上主呢？」

8 摩西應講：「你等在這位等，𠊎去聽上主有麼介指示！」

9上主吩咐摩西

10對以色列人講：「你等㧯你等个後代當中若有人因為憑到屍體就無淨浰，抑係出門在外，還係愛守𨃟過節；

11恁樣个人做得慢一隻月，就係在二月十四臨暗仔來守節。愛食無酵餅、苦菜㧯羊羔个肉；

12總係做毋得將賸到个食物留到第二朝晨，也做毋得拗斷羊羔个骨頭。愛照所有个條例來守𨃟過節。

13總係，若有人係淨浰个，又無出門旅行，佢敢毋守𨃟過節，就愛將佢對𠊎个子民中除掉，因為佢無在指定个日仔獻祭物給𠊎。佢一定愛擔當自家个罪。」

14「若係住在你等當中个外族人有人愛守𨃟過節，佢應該照所有个規定㧯條例來遵守。無論本地人抑係外族人，全部愛遵守共樣个法律。」

遮等聖帳篷个雲(出埃及記 40:34-38)

15約櫃个聖帳篷搭起來該日，有一片雲遮等它。暗晡時，這雲看起來像火。

16常常係恁樣，雲遮等聖帳篷，暗晡時這雲看起來像火。

17雲升上去个時，以色列人就徙營出發；雲停在㖠位，佢等就在該位安營。

18人民遵照上主个命令徙營，也遵照上主个命令安營。雲停在聖帳篷頂高幾久，佢等就留在該營地幾久。

19雲停在聖帳篷頂高有一站當長个時間，佢等還係聽從上主个命令，無徙營。

20有時雲停在聖帳篷頂高只有幾日。無論在樣般个情況，佢等全部遵照上主个命令徙營、安營。

21有時雲停留个時間只有一暗晡，朝晨頭就升上去。它一升上去，佢等就徙營。無論係日時頭抑係暗晡時，雲一升上去，佢等就徙營。

22無論係兩日、一隻月、一年抑係較久个時間，雲停在聖帳篷頂高个時，佢等就無徙營；雲一升上去，佢等就徙營。

23以色列人安營抑係徙營，全部係遵照上主通過摩西所命令个話去做。