1 巴比倫个偶像彼勒伏落去，尼波跍下去，
被人放在獸類㧯頭牲个背囊頂，
成做重擔，害牠兜當痶。
2偶像攏總跍下去、伏落去，
無辦法救自家；
它兜成做戰利品，被人捉走了。
3 雅各个子孫啊，愛聽𠊎个話；
賸到个以色列人啊，全部愛聽。
你等一出世，一出母胎，
𠊎就揇等你、關心你等。
4直到你等年老頭那毛變白个時，
𠊎一直看顧你等。
𠊎造你等，也愛養育你等；
𠊎愛揇你等，拯救你等。
5上主講：你等愛將𠊎㧯麼人來比？
有麼人㧯𠊎比抑得！
敢有人恁像𠊎嗎？
𠊎等做得來比看仔啊！
6有人打開皮袋仔，倒出一些金仔，
又用天平秤一些仔銀仔；
佢等請打金師傅打做偶像，
然後向它跪拜！
7佢等用肩頭將它扛起來，
放在安裝个所在，俾它企在該位，
它就毋會挺動。
有人向它祈禱，它毋會應佢；
它也毋會救人離開苦難。
8悖逆个人啊，愛記在心中，
你等愛認真回想這兜事。
9愛記得先前發生个事；
𠊎係上帝，並無別个神；
𠊎係上帝，無別个神㧯𠊎比抑得。
10一開始，𠊎就指明將來个結局；
𠊎古早就講明將來會發生个事。
𠊎講，𠊎个計劃一定會完成；
𠊎所歡喜个事，𠊎一定會實現。
11𠊎愛對東方召來一儕；
佢愛像鷹鳥對遠方來，
完成𠊎个計劃。
𠊎已經恁樣宣佈了，𠊎一定會做到；
𠊎所計劃个，𠊎一定使它實現！
12硬心个人啊，離開公義恁遠个人啊 ，
愛聽𠊎个話！
13𠊎愛親自將𠊎个公義 帶來，
該日仔無幾久了。
𠊎个救贖一定毋會延纏。
𠊎愛拯救錫安，
使以色列得到𠊎个榮光。
Who We AreWhat We EelieveWhat We Do
2025 by iamachristian.org,Inc All rights reserved.
