歷代志下 14 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

亞撒王打贏古實人

1 亞比雅王死後，葬在大衛城个王室墳墓肚；佢个孻仔亞撒承接佢做王。亞撒在位期間，國家有十年太平。

2亞撒行上主 — 佢个上帝看做好又正直个事。

3佢除掉外族人个祭壇㧯山岡頂个神廟，打碎石柱，斬掉亞舍拉女神个柱像。

4佢命令猶大人尋求上主 — 佢等祖先个上帝，行佢个教訓㧯誡命。

5亞撒王除掉所有猶大城鎮个神廟㧯燒香个祭壇。所以，在佢統治之下猶大國享受太平。

6這站期間，佢在猶大起幾座防衛城，國家多年無戰爭，因為上主賜給佢太平。

7佢對猶大人民講：「𠊎等愛起城牆、城樓㧯做得關做得閂个城門來堅固𠊎等个城。因為𠊎等遵行上主 — 𠊎等上帝个旨意，這地方還係屬𠊎等。佢一直保護𠊎等，賜給𠊎等四周圍平安。」所以佢等開始起造，凡事順利。

8亞撒王个軍隊包含三十萬裝備有大盾牌㧯槍个猶大人，又有二十八萬裝備細盾牌㧯弓箭个便雅憫人。佢等全部係當勇敢个戰士。

9 古實人謝拉帶領一百萬軍隊㧯三百輛戰車侵犯猶大；佢等來到瑪利沙。

10亞撒出去相㓾。雙方在瑪利沙附近个洗法山壢擺陣。

11亞撒向上主 — 佢个上帝祈禱：「上主啊，只有你正能幫助弱小个軍隊，也能幫助強大个軍隊。上主 — 𠊎等个上帝啊，這下求你幫助𠊎等，因為𠊎等偎靠你。𠊎等奉你个名出來㧯這強大个軍隊相㓾。上主啊，你係𠊎等个上帝，毋好俾人打贏你哦！」

12 亞撒㧯猶大軍隊攻打古實軍隊个時，上主打贏古實軍隊。佢等就逃走；

13亞撒帶領軍隊去逐，一直逐到基拉耳。古實軍隊戰死个人當多，無法度再相㓾 ；佢等被上主㧯佢个軍隊打輸；猶大軍隊搶走盡多戰利品；

14佢等毀滅基拉耳周圍个城鎮，因為該位个人民全部當驚上主。猶大軍隊盡勢搶該兜城鎮，搶到當多个戰利品。

15佢等也攻擊牧場，搶走盡多羊群㧯駱駝，然後轉去耶路撒冷。