詩篇 98 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上帝掌管世界一篇詩。

1愛對上主唱新个詩歌，

因為佢有行奇妙个事！

佢用大能㧯神聖个力量得勝。

2上主彰顯佢个勝利；

佢對萬國顯明佢个救恩。

3佢照佢對以色列人所應許个，

用不變个慈愛㧯信實款待佢等。

全世界看到𠊎等上帝个拯救。

4天下萬民啊，愛對上主歡呼！

你等愛用詩歌大聲頌讚佢！

5愛唱歌頌讚上主！

愛彈豎琴頌讚佢！

6愛吹號筒㧯羊角，

在上主 — 𠊎等个王面前歡呼！

7大海㧯其中个生物啊，

愛大聲歡呼！

大地㧯地上个萬物啊，

愛大聲唱歌！

8在上主面前，河壩愛拍手，

群山也愛同聲歡喜唱歌，

9因為佢愛來治理天下。

佢愛用公義統治世界；

佢愛用公平對待萬民。