利未記 27 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

許願个條例

1上主吩咐摩西

2向以色列人宣佈以下个條例。「有人向上主還特別許个願个時，愛照以下个規定來納錢。

3照聖所規定个標準：

大人，對二十歲到六十歲：

男人付五十隻銀幣，

4女人付三十隻銀幣。

5後生人，對五歲到二十歲：

細孻仔付二十隻銀幣，

細妹仔付十隻銀幣。

6細人仔，對一隻月到五歲：

細阿哥仔付五隻銀幣，

細阿妹仔付三隻銀幣。

7老人家，六十歲以上：

男人付十五隻銀幣，

女人付十隻銀幣。

8「還願个人若係因為窮苦無法度照所定个標準還清，就愛帶佢到祭司該位，祭司愛照佢納得起个能力另外規定價錢。

9「若係所許个願係有關獻給上主做牲儀个頭牲，這種禮物愛歸上主做聖物。

10許願个人做毋得用其他頭牲交換，好个換壞个抑係壞个換好个；若係有交換个，兩隻頭牲全部愛歸給上主。

11若係所許个願係有關無淨浰个動物，就係該做毋得獻給上主做牲儀个，許願个人就愛將頭牲牽到祭司該位。

12祭司愛照頭牲个好壞估價，佢講幾多就幾多。

13若係佢愛將頭牲贖轉來，一定愛照所估个價錢，加五分之一。

14「人獻屋仔給上主个時，祭司就愛照屋仔个好壞估價，佢講幾多就幾多。

15奉獻个人若係愛將該間屋仔贖轉來，一定愛付出原來个價錢，加五分之一，屋仔正歸給佢。

16「若係有人將所承接个一部份土地獻給上主，祭司就愛照該土地委種个量來估價，做得委一百公斤大麥種个土地價值係五十隻銀幣。

17佢若係在禧年奉獻个，就愛照價錢納清。

18佢若係在禧年以後奉獻个，祭司愛對該時到下一個禧年所賸个年數、所估个價錢來減掉。

19該人若愛將土地贖轉來，一定愛照所估價个數目加五分之一，土地正歸還佢。

20若係佢毋先對上主將該土地贖轉來，就將土地轉賣給別人，佢就失掉將該土地贖轉來个權利。

21到下一個禧年，該土地愛成做上主永久个產業，歸屬祭司。

22「若係有人將買來个土地 (毋係承接个土地) 獻給上主，

23祭司就愛對該時到下一個禧年所賸个年數來估價；該人一定愛當日就將價錢納給上主。

24到禧年，該土地愛還原主抑係佢个後代。

25「所有个價錢全部愛照聖所規定个標準。

26「頭胎个頭牲，無論係牛抑係羊，已經歸屬上主，所以人做毋得再拿牠來做甘心个祭物來獻，因為這係上主个。

27若係該頭胎係無淨浰个，佢做得照原來个價錢加五分之一贖轉來；若係毋贖轉來，做得照規定个價錢賣給別人。

28「該永遠獻給上主个，無論係人、頭牲，抑係承接个土地，全部做毋得賣給別人，也做毋得贖轉來，愛永遠歸屬上主。

29應當滅掉个人全部做毋得贖轉來，一定愛處死刑。

30「土地所出產个，無論係五榖抑係果子，十分之一係上主个；愛分別為聖歸給上主。

31若係有人想愛將這十分之一贖轉來，一定愛照規定个價錢再加付五分之一。

32十隻頭牲，無論係牛抑係羊，對牧人个杖經過个時，第十隻係上主个。逐擺算到第十隻，該隻就係上主个。

33主人做毋得拿別隻來換、將壞个換出來奉獻，也做毋得用別種个頭牲來換。若係佢用另外一隻來交換，兩隻全部係上主个，做毋得贖轉來。」

34這兜誡命係上主在西奈山交給摩西向以色列人宣佈个。