以賽亞書 65 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上帝責罰悖逆个人

1上主講：「𠊎準備好勢愛聽佢等个祈求，總係佢等毋求。𠊎緊等佢等來尋𠊎；總係佢等毋尋。𠊎緊喊：『𠊎在這位！𠊎在這位！』總係這個國家一直毋肯向𠊎祈禱。

2𠊎歸日擛手喊該兜悖逆个子民，總係佢等當硬頸，隨自家个意思做壞事。

3佢等時常當𠊎个面，惹𠊎發譴。佢等在『神聖花園 』肚、在外教个祭壇頂燒香、獻祭。

4暗晡頭，佢等坐在塚埔、在山窿肚過夜，在該位問鬼神。佢等食豬肉，啉無淨浰个湯，

5然後對別人講：『閃開！毋好接近𠊎等噢；𠊎等這下比你等聖潔！』主講：『𠊎實在無辦法忍受這兜人个行為；𠊎愛大發火了。』

6「看啊，𠊎寫好判決書。𠊎絕對毋會恬恬，𠊎一定會在佢等身項施行報應。

7𠊎愛因為佢等㧯佢等祖先所犯个罪報應佢等。佢等在山頂个廟肚燒香，在該位嘲謔𠊎，所以𠊎愛照佢等个壞行為責罰佢等。」

8上主恁樣講：「一串葡萄中還有做得做酒个，人就講：『毋好將它㧒掉，因為當中還有好个。』共樣，因為𠊎該兜僕人个緣故，𠊎也毋毀滅𠊎所有个子民。

9𠊎愛賜福給雅各个後代，使猶大支族个人承受𠊎該兜山。𠊎个選民會承受該地，𠊎該兜僕人會住在該位。

10佢等會在西片个沙崙平原上掌羊仔，在東片个亞割山壢中掌牛仔；這兜係𠊎愛給尋求𠊎个子民个。

11「總係，你這兜離開上主个人，又毋記得錫安 — 𠊎个聖山，你等為迦狄㧯米尼，就係稱做『幸運』㧯『命運』个神明擺上調好个酒。

12你等註定愛慘死在刀下；因為𠊎喊你等，你等毋應𠊎；𠊎講話，你等毋聽。𠊎眼中看做壞个事，你等反轉去行；𠊎所惱个事，你等偏偏當好。

13所以，𠊎 — 至高个上主㧯你等講，𠊎該兜僕人會有罅額个飲食，總係你等會又飢又渴。𠊎該兜僕人會歡喜，總係你等會見笑。

14𠊎該兜僕人會歡喜到唱歌，總係你等會傷心到大噭，心肝痛到盡喊。

15𠊎个選民會將你等个名看做咒詛。𠊎 — 至高个上主愛㓾死你等，總係𠊎該兜僕人，𠊎愛賜給佢等新个名。

16在這垤土地上，所有求福个人全部愛到信實个上帝面前來求。所有發誓个人全部愛奉信實个上帝發誓。因為頭擺个困難全部毋記得，也看毋到了。」

新个創造

17上主講：「𠊎愛創造新天新地。先前个事全部毋會再受紀念，也毋記得了。

18你等愛因為𠊎所創造个永永遠遠歡喜快樂。看啊，𠊎所創造个新耶路撒冷會充滿喜樂，城肚个人民會歡喜快樂。

19𠊎自家也會因為耶路撒冷㧯城肚个人民來喜樂。在該位，毋會再聽到大噭㧯盡喊个聲。

20在該位，毋會再有出世幾日就夭折个孲𤘅仔；老人家全部會享長壽。食到一百歲死个，還算係後生；吂滿一百歲死个，做得講係受𠊎咒詛个。

21佢等會起屋，自家住；佢等會種葡萄，自家食。

22佢等毋會起屋，別人卻來住；佢等毋會種葡萄，別人卻來食。𠊎个子民會像樹仔恁長命。𠊎个選民會長長久久享受自家工作个成果。

23佢等个勞碌毋會空空；所𫱔个子女毋會堵到災難。𠊎 — 上主愛賜福給佢等㧯佢等个子子孫孫。

24佢等還吂求，𠊎已經應了；佢等祈禱還吂煞，𠊎已經答應了。

25豺狼㧯羊仔會共下食；獅仔像牛仔共樣食草；蛇會食泥、毋會咬人。在錫安 — 𠊎聖山个逐所在，毋會再有傷害㧯邪惡个事。」上主恁樣宣佈了。