尼希米記 5 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

尼希米處理官長个剝削

1過一站時間，盡多人，男个女个，開始怪怨佢等个猶太同胞。

2有兜講：「𠊎等係子女恁多个大家庭，需要糧食來過日！」

3有兜講：「𠊎等高不將愛抵押田地、葡萄園㧯屋仔，正有糧食充飢。」

4也有人講：「𠊎等已經借錢來納田地㧯葡萄園个稅給皇帝。

5𠊎等㧯𠊎等个猶太同胞係共種族；𠊎等个子女㧯佢等个子女無麼介分別。總係𠊎等卻愛迫自家个子女去做奴才，𠊎等个妹仔有兜已經做奴婢了，𠊎等無力拯救，因為𠊎等个田地㧯葡萄園已經變做別人个。」

6𠊎聽到佢等个怪怨㧯所講个話，就大發譴，

7決定愛解決這事。𠊎責備該兜民眾个領袖㧯官長講：「你等樣般敢剝削自家个兄弟？」

然後𠊎聚集群眾開會來處理這問題，

8對佢等講：「𠊎等識盡最大个努力贖轉該兜賣給外族个猶太兄弟。這下你等反轉強迫兄弟賣自家給你等 — 給自家个猶太个同胞！」該兜領袖全部恬恬，無話好講。

9所以𠊎又講：「你等恁樣做實在毋著！你等敢毋係應該敬畏上帝，去做著个事？毋好俾𠊎等个外邦對敵有任何个理由恥笑𠊎等。

10𠊎識借錢借糧食給同胞；𠊎个朋友㧯工人也識借給同胞。這下，𠊎等愛免掉所有个利息，

11無論係錢、糧食、酒、油，全部毋使佢等還；愛即時將佢等抵押个田地、葡萄園、橄欖園、㧯屋仔還佢等。」

12該兜領袖應講：「𠊎等願意照你講个去做，退還佢等个財產，毋會再向佢等討債。」

𠊎召集祭司來，喊該兜領袖在佢等面前發誓，愛遵守頭下个約定。

13然後，𠊎解開腰帶 ，擉等講：「上帝愛恁樣擉毋守約定个人，擉掉佢个屋仔㧯一切所有个，使佢麼介就無。」

所有在場个人全部講：「阿愐！」又讚美上主。該兜領袖就照佢等个約定去做。

尼希米做事公當

14對𠊎做猶大省長个十二年來，就係對亞達薛西做皇帝个第二十年到三十二年，𠊎㧯𠊎个兄弟全部無食省長應該得到个糧食。

15在𠊎以前該兜省長全部係人民个重擔；佢等要求人民逐日 為到糧食、酒繳四十隻銀幣。連佢等个僕人也欺壓人民。總係𠊎毋恁樣做，因為𠊎敬畏上帝。

16𠊎全心在重建城牆；𠊎並無買產業。𠊎个僕人也全部參加重建个工作。

17平常㧯𠊎共下食飯个猶太人民㧯領袖有一百五十人，另外還有對鄰國來見𠊎个人。

18逐日，𠊎愛準備一隻牛牯，六隻肥羊，㧯盡多雞仔。每十日，𠊎愛供給一批新酒。雖然恁樣，𠊎並無要求省長應該得到个糧食，因為𠊎知人民个負擔已經當重了。

19𠊎个上帝啊，求你紀念𠊎為人民所做个事，施恩給𠊎。