1有關摩押，上主 — 萬軍个元帥、以色列个上帝恁樣講：
尼波慘了；它會荒廢！
基列亭會受侮辱，會被人佔領。
它个城堡會被人拆掉，
人民會受到羞辱。
2 摩押毋會再受人稱讚了。
敵人佔領希實本，
計謀消滅摩押人个國家。
瑪得緬會恬恬毋敢講話；
它个人民會被刀劍追殺。
3 何羅念个人民會大聲噭：
「荒廢了，毀滅了！」
4 摩押毀滅了；
它个細人仔大聲盡噭。
5在上魯希个崎頂，
會聽到佢等个噭聲；
在下何羅念个路項，
會聽到佢等痛苦到緊噌个聲。
6你等愛逃走，遽遽逃命噢！
像曠野个野驢盡命仔走 ！
7 摩押啊，你識倚靠自家个軍力㧯財力，
這下，你自家也會被人佔領。
你个神明基抹會㧯它个祭司、官員共下被人捉去。
8所有个城市全部會毀滅，
一座也無留下來；
山壢會被人踐踏，
平原會受毀壞。
𠊎 — 上主恁樣宣佈了。
9愛在摩押地委鹽使土地用毋得，
因為它一定會毀滅 。
它个城市會成做荒埔，
毋會再有人住了。
10(毋專心做上主工作个人愛受咒詛！毋擎起刀劍㓾敵人个人愛受咒詛！)
摩押个城市受毀滅11上主講：「自從成做國家以來，摩押常常享受安樂，毋識被人捉走。摩押像封在酒罌肚个酒，無被人倒來倒去，一直香馥馥，酒味無走掉。
12「看啊，日仔會到，𠊎愛派人將摩押倒掉，像倒酒恁樣。佢等會將酒罌倒到淨淨，又愛㧹碎酒罌。
13摩押人會因為佢等个神明基抹感覺當見笑，像以色列人因為佢等所偎靠个神明貝特利
感覺當見笑。」14 摩押人啊，樣會自家講係英雄？
樣會自家講係當會相㓾个勇士？
15 摩押會被人毀滅，它个城市會被人佔領；
它最精良个青年軍會被人消滅。
𠊎个名安到上主 — 萬軍个元帥，𠊎係大君王；
𠊎恁樣宣佈了。
16 摩押个災禍迫近了；
它个苦難當遽會到了。
17 摩押四周圍个國家啊，
聽過它名聲个民族啊，
你等愛悲傷講：
專制个霸權橫掉了！
它威嚴个榮光毋見了！
18住在底本个人啊，
對你等光榮个所在下來，
坐在燥燥个地上！
因為愛毀滅摩押个人到了；
佢已經毀壞摩押个城堡。
19 亞羅珥个人民啊，
企在路堘看，
去問該兜逃難个人，
到底發生麼介事情？
20佢等會應講：
摩押受羞辱、被敵人打橫了！
愛為它悲傷大噭！
你等愛在亞嫩河岸宣告：
摩押滅亡了！
21「審判已經臨到平原各城市，就係：何倫、雅雜、米法押、
22底本、尼波、伯‧低比拉太音、
23基列亭、伯‧迦末、伯‧米恩、
24加略、波斯拉。審判已經臨到摩押逐隻城市，無論遠近。
25摩押个武力被人廢掉，它个霸權被人破壞。𠊎 — 上主恁樣宣佈了。」
摩押會受侮辱26上主講：「你等愛使摩押酒醉，因為它自高自大，悖逆𠊎。摩押會橫在自家嘔出來个東西底背，被人恥笑。
27摩押啊，你記得麼？你識嘲謔以色列人，逐擺講起佢等，你就搖頭，看佢等像捉到个賊仔。
28「摩押人啊，你等愛遽遽離開城市，去住在山巖肚！像月鴿仔在深山肚做藪！
29摩押人非常驕傲自大。𠊎聽人講過佢等係樣般驕傲，看人毋起，恅到自家當會！
30𠊎 — 上主知佢等个驕傲。其實，佢等所誇口个全部係虛假个，所做个事全部盡無實在。
31所以，𠊎愛為所有个摩押人㧯吉珥‧哈列設人傷心大噭。
32𠊎愛為西比瑪人盡噭，比為雅謝人噭到還較悽慘。西比瑪城啊，你像一頭葡萄樹，樹枝伸過死海，直到雅謝
。總係，毀滅个人來打壞你成熟个果子㧯你个葡萄。33摩押盡肥个土地毋會再有歡喜快樂个聲。𠊎使醡酒池毋會再流出美酒；人會聽到盡喊个聲，總係毋係榨酒歡喜个聲！
34「希實本人㧯以利亞利人在該位傷心大噭。佢等个噭聲傳到雅雜；瑣珥人也聽得到，連何羅念人㧯伊基拉‧施利施亞人也全部聽得到；因為連寧林个河壩水也全部燥掉了。
35𠊎絕對無俾摩押人繼續在祭壇頂獻燒化祭，毋俾佢等向自家个神明燒香。𠊎 — 上主恁樣宣佈了。
36「𠊎个心為摩押人㧯吉珥‧哈列設人悲傷，就像人用笛仔歕哀歌，因為佢等所有个財產無掉去了。
37佢等剃掉頭那毛，剃光鬍鬚。佢等割傷自家个手，著麻衫。
38摩押地區所有个屋頂㧯廣場，全部有大噭个聲；因為𠊎打擊摩押，就像㧹碎無人愛个罌仔。
39佢等開聲大噭！摩押被人打碎了！摩押受侮辱了！摩押荒掉；周圍个國家全部嘲謔它、看到它堵到个災難就盡著驚。𠊎 — 上主恁樣宣佈了。」
摩押無法度逃走40上主講：「會有一個國家像鷹鳥打開翼胛，飛下來攻擊摩押，
41佔領它个城市㧯軍事設備。該時，摩押个戰士心肝會像陣痛个產婦恁樣無葛無煞。
42摩押會被人滅掉，毋會再成做國家，因為它自高自大，悖逆𠊎。
43恐怖、陷阱、羅網會等等摩押人。𠊎 — 上主恁樣宣佈了。
44想愛走閃恐怖个，會跌落陷阱；爬出陷阱个，會落入羅網；因為𠊎 — 上主已經決定責罰摩押个日仔。
45當𤸁當痶个難民想愛走到希實本去要求保護，總係西宏王統治過个這座城已經燒做灰 。火將作亂个摩押人个防線㧯城堡燒到淨淨。
46摩押人慘了！拜基抹神明个人知死了！佢等个子女全部會被人捉走。
47「總係有一日，𠊎愛俾摩押人轉去，重整家園。𠊎 — 上主恁樣宣佈了。」
以上係上主所講摩押會受到个審判。
Who We AreWhat We EelieveWhat We Do
2025 by iamachristian.org,Inc All rights reserved.
