1該時，羅馬皇帝奧古斯都下令，喊羅馬帝國个全體人民登記戶口。
2這係頭一擺个戶口登記，係在居里扭做敘利亞總督个時。
3大家攏總轉本鄉去辦理登記。
4 約瑟也對加利利省个拿撒勒城去猶太，到大衛个城，名安到伯利恆；因為約瑟係屬大衛个宗族。
5佢愛同佢个未婚妻馬利亞共下去登記。馬利亞已經有身項；
6佢等在伯利恆个時，姖个產期就到。
7姖𫱔頭胎个孻仔，用布包起來，放在馬槽底背，因為旅舍無所在好俾佢等住。
掌羊个人㧯天使8在伯利恆个野外，有兜掌羊个人暗晡頭住在該位，輪流掌羊。
9主个天使對佢等顯現，主个榮光四面照等佢等，佢等就非常著驚。
10天使對佢等講：「毋使驚！𠊎愛報你等好消息；這消息會帶給萬民極大个歡喜。
11今晡日，在大衛个城肚，有一位救主為到你等出世，就係主基督。
12你等會看到一個孲𤘅仔，用布包等，睡在馬槽底背；該就係記號。」
13忽然，有一大隊个天軍出現，同該天使共下，頌讚上帝講：
14願榮光歸給在天頂至高个上帝；
願平安賜給地上佢所歡喜个人。
15天使離開佢等、轉去天頂个時，掌羊个人彼此講：「𠊎等來去伯利恆，看主所指示𠊎等已經發生个事。」
16所以，佢等就趕緊去，尋到馬利亞、約瑟，㧯睡在馬槽底背个孲𤘅仔。
17掌羊个人看到後，就將天使所講關係孲𤘅仔个事㧯大家講。
18所有聽到个人攏總盡奇怪掌羊个人對佢等講个話。
19總係馬利亞將這一切个事記在心中，反覆思想。
20掌羊个人轉去，就榮光上帝、頌讚佢，因為佢等所看到个事，㧯對天使聽到个完全共樣。
安名耶穌21八日後，孲𤘅仔行割禮个日仔到了，就為佢安名喊耶穌；這個名係佢吂成胎以前天使代佢安个。
奉獻給主22照摩西法律个規定，潔淨个日期滿後，約瑟㧯馬利亞帶孲𤘅仔去耶路撒冷，愛將佢奉獻給主。
23(這係照主个法律所寫：「凡係頭胎个孻仔，一定愛奉獻給主。」)
24佢等也愛照主个法律所規定个，獻一對个班鳩抑係兩隻細月鴿仔做祭物。
25當時，在耶路撒冷有一個人，名安到西面。佢係敬畏上帝个義人，時刻盼望以色列个安慰者來到。聖靈㧯佢同在；
26佢已經得到聖靈个啟示，知自家在離開世間以前會看到主所應許个基督。
27聖靈感動佢，佢就入去聖殿。這時，耶穌个爺𡟓堵好揇等孲𤘅仔耶穌入來，愛行法律所規定个事。
28西面將孲𤘅仔揇在胸前，頌讚上帝講：
29主啊，你所應許个已經實現；
這下，好俾你个僕人平安離開世間。
30𠊎親眼看到你个拯救，
31就係你為萬民準備个：
32佢愛成做啟示外邦人个光，
做你个子民以色列个光榮。
33孲𤘅仔个爺𡟓對西面所講關係佢个事感覺盡奇怪。
34西面為佢等祝福，又對孲𤘅仔个阿姆馬利亞講：「這孲𤘅仔被上帝揀選，係為到以色列中盡多人个滅亡，㧯盡多人个得救。佢會成做盡多人譭謗个對象，
35用恁樣來顯出這兜人心中个意念。憂傷會像利劍刺穿你个心。」
36又有一個女先知，名安到安娜，係亞設支族法內力个妹仔。姖已經盡老。姖結過婚，同姖个老公共下生活七年久，
37後來就守寡，這下係八十四歲 。姖毋肯離開聖殿，日夜敬拜上帝，禁食祈禱。
38這時，姖堵好也來感謝上帝。姖對所有等候上帝救贖耶路撒冷个人講起這孲𤘅仔个事。
轉拿撒勒39 約瑟㧯馬利亞照主个法律行一切所規定个事後，就轉加利利，到佢等个本鄉拿撒勒去。
40細人仔漸漸大，勇健又滿有智慧；上帝个恩典㧯佢同在。
少年耶穌在聖殿41耶穌个爺𡟓逐年去耶路撒冷守𨃟過節。
42耶穌十二歲个時節，佢等照常去守節。
43節期過掉，佢等就起身轉去，總係少年耶穌留在耶路撒冷；佢个爺𡟓毋知這件事，
44恅到佢在同行个人群中間；行一日个路程後，正在親友个中間尋佢。
45佢等尋佢毋到，就倒轉耶路撒冷去尋。
46到第三日，佢等正在聖殿肚尋到佢。該時佢坐在猶太教師个中間，一面聽，一面問；
47所有聽到佢个人攏總盡希奇佢个聰明㧯回答。
48佢个爺𡟓看到佢，感覺盡奇怪。厥姆對佢講：「孻仔啊，你做麼介恁樣對待𠊎等呢？你看，若爸㧯𠊎逐所在尋你，愁到會死！」
49耶穌應講：「做麼介尋𠊎？敢講你等毋知𠊎應當愛在吾爸个屋下 ？」
50總係佢等毋了解佢這句話个意思。
51耶穌就跈佢等共下轉去拿撒勒城，凡事順從爺𡟓。厥姆將這一切个事全部記在心中。
52耶穌个身體緊來緊高大，智慧也跈等緊增加，上帝㧯人也越來越惜佢。
Who We AreWhat We EelieveWhat We Do
2025 by iamachristian.org,Inc All rights reserved.
