申命記 21 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

吂結案个謀殺案件

1「你等在上主 — 你等个上帝愛賜給你等个土地上，若係發現有人被人㓾死，屍體被人㧒在野地，總係毋知係麼人㓾个，

2你等个長老㧯審判官就愛去到㧒屍體个現場，對該位量到周圍各城鎮个距離，

3看㖠座城最近現場。該城个長老就愛選一隻毋識掛過軛、毋識耕過田个細牛乸，

4將牠牽到毋識燥過水个河壩滣，在無人耕種過个地方打斷牠个頸筋。

5利未祭司也愛跈等去，因為佢等愛決裁有關相爭㧯兇殺所有个案件。上主 — 你等个上帝已經揀選佢等來事奉佢，奉佢个名祝福。

6最近現場該城个長老，全部愛在該隻細牛乸頂高洗手，

7然後祈禱講：『𠊎等無㓾這個人，也無看到麼人㓾死佢。

8上主啊，求你赦免你對埃及拯救出來个子民以色列。求你赦免𠊎等，莫俾𠊎等揹㓾無罪个人个血債。』

9你等恁樣實行上主个要求，就毋使揹這㓾人个血債。」

相㓾捉到女人个條例

10「上主 — 你等个上帝使你等打贏仇敵，捉人轉來，

11你可能在捉來个人當中發現盡靚个細妹仔，當合意，想討姖做𡜵娘。

12恁樣，你就做得帶姖轉屋下。姖應該剃頭那毛，剪手指甲、腳指甲，

13換掉舊个衫褲，住在你屋下為姖个爺𡟓哀傷一隻月。經過這站時間，你就做得㧯姖結婚。

14後來你若係毋愛姖，就愛放姖自由；因為你識強迫姖㧯你結婚，毋好將姖準做奴婢賣掉。」

長子繼承權个條例

15「若係有人有兩個𡜵娘，佢惜其中个一儕，無惜另外一儕。佢等兩儕㧯佢𫱔孻仔，總係長子係該佢無惜个𡜵娘𫱔个；

16到分財產个時，佢做毋得偏心，做毋得將長子个權利轉給所惜个𡜵娘𫱔个孻仔。

17就算長子係佢無惜个𡜵娘所𫱔个，也愛承認佢長子个權利，在分財產个時愛加一份給佢。佢係長子，係阿爸最後生个時𫱔个，應該得到長子个特權。」

處理逆子个條例

18「若係有人有硬頸又悖逆个孻仔，雖然逐擺受處罰，佢還係毋聽從爺𡟓个話，

19爺𡟓就愛捉佢，帶佢到本城門口、該兜長老面前接受審判。

20佢等愛對該兜長老講：『𠊎等个孻仔硬頸悖逆，毋聽從𠊎等个話，歸日好酒放蕩。』

21城肚个人民就愛用石頭㧹死佢。恁樣，就能對你等當中除掉這種壞事。以色列人民聽到這種事，大家正會驚。」

其他條例

22「若係有人處死刑，屍體掛在𣎴仔頂，

23這屍體做毋得留在𣎴仔頂到第二日，一定愛在該日埋葬，因為屍體掛在𣎴仔頂會來惹上帝咒詛該土地。你等愛埋葬屍體，免得打垃圾上主 — 你等个上帝賜給你等个土地。」