1該時，摩西㧯以色列人民向上主唱歌：
𠊎愛唱歌頌讚上主，
因為佢得到光榮个勝利；
佢將戰馬㧯騎兵㧹落海肚。
2上主係𠊎个力量，𠊎个詩歌；
佢拯救𠊎。
佢係𠊎个上帝，𠊎愛頌讚佢；
佢係吾爸个上帝，𠊎愛讚美佢。
3上主係戰士；
上主係佢个名。
4佢將埃及王个戰車㧯軍隊㧹落海肚，
將特選个軍官浸死在紅海底背。
5深海吞掉佢等；
佢等像石頭沈落海底。
6上主啊，你个右手顯出榮耀㧯大能；
上主啊，你个右手將敵人打到糜糜。
7你無比个威嚴征服仇敵；
你个怒氣燒掉佢等，像燒禾稈。
8你向海洋歕氣，水就堆起來，
大水像牆壁企到嶝嶝；
海中个深水變做燥地。
9仇敵講：『𠊎愛逐佢等，捉到佢等；
𠊎愛分佢等个財產，由在𠊎搶。
𠊎愛挷出刀劍，親手來滅佢等。』
10總係上主啊，你歕一口氣，
海就將佢等吞掉；
佢等像鉛鐵，沈到深水中。
11上主啊！恁多神明當中，㖠有像你个？
㖠有像你恁神聖恁有威嚴个？
㖠有像你恁得人驚恁有光榮个？
㖠有像你恁會行神蹟奇事个？
12你伸出右手，
大地就吞滅仇敵。
13你用不變个慈愛𢱋你所拯救个子民；
你用大能帶佢等到你个聖所。
14萬國聽到，驚到愊愊掣；
非利士人愁到無葛煞。
15 以東个領袖著驚，
摩押个英雄愊愊掣，
迦南人个膽都嚇爛。
16恐怖㧯著驚臨到佢等！
上主啊，佢等看到你个大能；
佢等驚到像石頭毋敢挺動，
直到你个子民過去，
直到你所救贖个子民行過去。
17你帶佢等入你个山，在該位栽培佢等；
該位係你 — 上主選來住个地方，
就係你自家所起个聖所。
18上主的確會做王，
直到永永遠遠！
美莉安个歌19 以色列人行燥地過海；總係埃及王个戰馬、戰車、㧯騎兵進入海肚个時，上主使海水合起來，將佢等全部浸死。
20 亞倫个阿姊女先知美莉安手拿等鈴鼓，盡多婦女跈等姖，緊打鼓，緊跳舞，
21美莉安唱歌㧯姖等和聲：
「愛唱歌頌讚上主，
因為佢得到光榮个勝利；
佢將戰馬㧯騎兵㧹落海肚。」
苦水22後來，摩西𢱋以色列人民離開紅海，來到書珥曠野，在曠野中行三日久，尋毋到水好食。
23佢等來到瑪拉；該位个水係苦个，食毋得。 (因為恁樣，該地方正安到瑪拉
。)24人民埋怨摩西，問佢講：「𠊎等愛啉麼介呢？」
25摩西迫切在上主面前祈求；上主指給佢看一隻樹頭。佢將樹頭㧹入水底背，水就變做甘甜个水。
上主在該地方為佢等定法律，又在該位考驗佢等。
26佢講：「若係你等完全順從𠊎 — 上主你等个上帝 — 做𠊎認為著个事，聽𠊎个命令，遵守𠊎一切个法律，𠊎就毋會用責罰埃及人个病痛來責罰你等；因為𠊎係醫治你等个上主。」
27後來佢等到以琳；該位有十二窟泉水㧯七十頭棕樹。佢等就在水邊安營。
Who We AreWhat We EelieveWhat We Do
2025 by iamachristian.org,Inc All rights reserved.
