1 錫安啊，䟘起來！
再堅強起來！
耶路撒冷聖城啊，
將你高貴个衫褲著起來！
無受割禮、無淨浰个人毋會再入你个城門了。
2 耶路撒冷啊，撥淨塵灰！
䟘起來，倒轉去坐你个寶座！
錫安被人捉走个人民啊，
解開䌈等你頸筋个鎖鍊！
3上主對佢个子民恁樣講：「你等被人賣做奴才，無人付代價給你等；共樣，你等得自由也毋使付錢。
4你等頭擺到埃及暫住係自願个；後來亞述人用武力將你等捉去，一個銀也無付給你等。
5這下，在巴比倫發生共樣个事。你等係無緣無故被人捉去个人；佢等並無付麼介工錢給你等。統治你等个人非常驕傲，一直藐視𠊎个名。
6𠊎个子民將來會知𠊎正係上帝，因為講過這兜話个就係𠊎。」
7該攀山過嶺來个使者，
佢个腳跡還靚噢！
佢來報好消息 —
就係和平个消息，得救个好消息。
佢對錫安講：
你个上帝掌權了！
8城頂个守望者會大聲喊；
佢等也會共下大聲歡喜唱歌！
因為上主轉到錫安个時，
佢等會親目看到。
9 耶路撒冷荒掉个所在啊，
愛大聲喊，大聲唱歌！
上主愛救贖佢个城，
愛安慰佢个子民。
10上主愛在萬國个面前，用聖手拯救佢个子民；
普天下个人全部會看到𠊎等上帝个救恩。
11好離開了！遽遽離開！對巴比倫出來！
扛上主聖殿用品个人啊，
毋好摸到無淨浰个東西！
離開个時愛保持聖潔！
12你等離開个時，毋使著急；
你等毋係逃命。
上主愛在頭前𢱋你等；
以色列个上帝也會在後背保護你等。
受苦个僕人13上主講：
看啊，𠊎个僕人盡有智慧、完成使命；
佢會受人尊重，得到最大个光榮。
14盡多看到佢个人攏總當著驚，
無人个面貌像佢个恁毋好看，
差毋多毋成人形。
15因為恁樣，佢會使盡多國家个人著驚；
盡多君王會驚到揞自家个嘴。
因為，佢等會看到從來毋識聽過个，
明白毋識有人㧯佢等講過个事。
Who We AreWhat We EelieveWhat We Do
2025 by iamachristian.org,Inc All rights reserved.
