以賽亞書 32 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

公正个王

1有一日，會有用正義掌權个國王㧯用公平治理國家个領袖出現。

2佢等逐儕都像做大風、落大水个時，俾人囥一下个所在；在沙漠中像泉水俾人止渴，在旱地中像大磐石个陰影俾人透涼。

3看得到个人，毋會再目珠眨眨；聽得到个人，毋會再耳公背背。

4急性个人會有智識，結舌个人講話會變清清楚楚。

5毋會再有人喊戇檔人做高明，也無人稱搞怪个人做君子。

6戇檔人講戇話，專門想愛做壞事；佢个言行舉止常常侮辱上主。佢從來毋給肚飢个人食飯，毋給嘴燥个人啉水。

7搞怪个人手段惡毒；佢用詭計剝削窮苦人；佢講花撩，害窮苦个人得毋到公平。

8總係高明个人計劃高明个事；佢對頭到尾堅持做高明个事。

審判㧯復興

9你這兜無愁無慮、生活安樂个婦女啊，愛注意聽𠊎个話。

10這下你等可能平安滿足；總係明年這個時節，你等會無葛無煞，因為無葡萄好收成了。

11你等一直無愁無慮，過安樂个生活；到時就會無葛無煞。你等會脫掉靚衫，用爛布繫在腰圈。

12你等會捶心肝哀傷，因為盡好个農場㧯收成豐富个葡萄園全部毀滅了。

13在𠊎子民个土地上，會生滿竻仔㧯蒺藜。你等會為到本來歡喜快樂个家庭㧯繁榮个城市捶心肝哀傷。

14王宮會荒廢，鬧熱个城市無人住。山頂个城堡㧯城樓永遠成做荒山。野驢仔盡好在該位搞，羊群在該位食草。

15總係上帝愛再一擺差遣佢个靈來到𠊎等當中。荒地會變做肥田；肥田變做茂盛个樹林。

16該時，無論在荒埔抑係肥田攏總會有公平㧯正義。

17公平會帶來平安；正義會帶來永遠安居樂業。

18上帝子民个家園非常安全、滿有平安，無愁無慮。

19(總係冰雹會降在樹林中；城會被人拆掉！)

20該兜在水邊安心耕種、由在牛仔㧯驢仔在草場食草个人實在有福氣噢！