何西阿書 9 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

何西阿宣佈以色列愛受个責罰

1 以色列人啊，毋好再㧯異教徒共樣恁歡喜慶祝你等个節期。你等已經離開你等个上帝，對佢不忠。你等在逐個禾埕，像妓女恁樣歡喜賣身賺食。

2總係，禾埕个五榖㧯油槽个橄欖油無罅你等食；盼望得新酒也空空。

3以色列人做毋得繼續住在上主賜給佢等个土地上；佢等愛倒轉去埃及，也愛在亞述食無淨浰个食物 。

4該時，佢等無可能斟酒獻給上主，也無可能向佢獻祭。佢等食个東西像喪家个食物，會打垃圾食个人。佢等个食物做得食飽定定，做毋得帶入上主个聖殿做祭物。

5恁樣，在指定敬拜上主个節期，佢等還做得做麼介呢？

6因為，災難會到，佢等愛逃走；總係埃及人愛將佢等个屍體收轉去，喊孟斐斯人將佢等埋掉！佢等个家園，囥財寶个所在，將來會生滿雜草㧯竻仔。

7責罰个日仔到了！報應个日仔到了！這事發生个時，以色列就知了！你等講：「這先知係大戇牯；這被靈感動个人係癲仔。」你等罪大惡極，正恁樣惱𠊎。

8𠊎係㧯上帝同行个先知，就係以色列个守望者。總係，𠊎無論到麼介所在去，佢等設羅網愛害𠊎，像捉鳥仔共樣。在上帝个土地，堵到𠊎个竟然全部看𠊎做敵人。

9這兜人已經沈落罪惡當中，就像佢等以前在基比亞

个時共樣。上帝一定會記得佢等个罪惡，責罰佢等。

以色列个罪㧯結局

10上主講：「𠊎頭擺堵到以色列，就像在曠野發現葡萄；𠊎頭擺堵到你等个祖先，就像在無花果樹頂尋到新出个果子。總係，佢等一來到批珥山，就開始拜巴力這恁見笑个神明，當遽就變做㧯佢等所愛个神明共樣邪惡。

11以色列个光榮會像鳥仔飛走。在國內，婦人家毋會再𫱔，毋會再懷胎，也毋會再有身項。

12就算姖等有養育細人仔，𠊎也愛使佢等个子女死掉，一個也無留。𠊎離開𠊎个子民，該時佢等就有災禍了！」

13上主啊！𠊎看到以色列个子女註定愛被人捉去 ，愛被人㓾。

14恁樣，𠊎應該樣般求你對待你个子民呢？求你使佢等个婦人家落胎，也無乳水！

上主審判以色列人

15上主講：「以色列人在吉甲行一切个惡事，𠊎就係在該位開始恨佢等。因為佢等所做个壞事，𠊎愛將佢等逐出𠊎个土地。𠊎毋會再惜佢等，因為佢等所有个官長全部悖逆𠊎。

16以色列人愛受責罰像樹頭燥掉，毋會結果子。佢等毋會有後代；就算佢等𫱔細人仔，𠊎也一定愛將佢等所愛个子女㓾掉。」

先知論以色列

17𠊎所事奉个上帝愛豁掉佢个子民。因為佢等毋聽從佢；佢等愛在列國中流浪。