歷代志上 15 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

準備運約櫃

1 大衛在大衛城為自家起王宮，也為上帝个約櫃預備所在，搭一座帳篷。

2該時大衛講：「只有利未人做得扛上帝个約櫃，因為佢等係上主選出來个人，愛扛上主个約櫃、永遠事奉佢。」

3所以大衛召集全部以色列人到耶路撒冷，愛將上主个約櫃運到大衛預備个所在。

4大衛又召集亞倫个後代㧯利未人：

5 哥轄宗族个烏列帶領一百二十人；

6 米拉利宗族个亞帥雅帶領兩百二十人；

7 革順宗族个約珥帶領一百三十人；

8 以利撒反宗族个示瑪雅帶領兩百人；

9 希伯崙宗族个以列帶領八十人；

10 烏薛宗族个亞米拿達帶領一百一十二人。

11 大衛召見祭司撒督㧯亞比亞他，還有六個利未人 — 烏列、亞帥雅、約珥、示瑪雅、以列、亞米拿達，

12對佢等講：「你等係利未逐宗族个領袖；愛潔淨你等自家㧯共族个利未人，好將上主 — 以色列上帝个約櫃扛到𠊎所預備个所在去。

13因為上擺你等無㧯𠊎等共下去扛約櫃，上主 — 𠊎等个上帝責罰𠊎等，因為𠊎等無問佢照規定愛樣般安排。」

14所以，該兜祭司㧯利未人潔淨自家，為到愛請上主 — 以色列上帝个約櫃。

15利未人照上主通過摩西所命令个，用槓仔將上帝个約櫃扛在肩頭頂。

16 大衛命令該兜利未人个領袖派利未人唱歌，用豎琴㧯鑇仔彈奏快樂个音樂。

17-21佢等對當會唱歌个宗族選出以下个人來打銅鑇仔：約珥个孻仔希幔、佢个親戚比利家个孻仔亞薩，㧯米拉利族古沙雅个孻仔以探。佢等又選出以下个利未人來彈高音个豎琴，配合銅鑇仔；這兜人係撒迦利雅、雅薛、示米拉末、耶歇、烏尼、以利押、比拿雅、瑪西雅。

佢等也選出彈低音豎琴个利未人；這兜人係瑪他提雅、以利斐利戶、彌克尼雅、亞撒西雅，並聖殿守衛 — 俄別‧以東㧯耶利。

22 基拿尼雅對音樂當精通，所以受選出來帶領利未人唱歌。

23-24比利家、以利加拿，還有俄別‧以東㧯耶希亞受派看守約櫃。示巴尼、約沙法、拿坦業、亞瑪賽、撒迦利雅、比拿亞、㧯以利以謝這兜祭司受派在上帝个約櫃前歕喇叭。

運約櫃到耶路撒冷(撒母耳記下 6:12-22)

25 大衛㧯以色列該兜長老，還有軍隊該兜軍官全部去，對俄別‧以東个屋下歡歡喜喜迎上主个約櫃。

26因為上帝幫助扛約櫃个利未人，佢等就獻七隻牛牯㧯七隻綿羊牯來做牲祭。

27大衛㧯扛約櫃个利未人，還有聖歌隊㧯佢等个隊長基拿尼雅，全部著等幼麻紗个外袍。大衛另外還著一領麻紗以弗得。

28所以，所有个以色列人民跈上主个約櫃共下到耶路撒冷。佢等歸路大聲喊，歕羊角，還有歕喇叭、打鑇仔，並彈豎琴㧯七弦琴个音樂。

29上主个約櫃入大衛城个時，掃羅个妹仔米甲對窗門看出來，看到大衛王放勢跳舞，就看輕佢。