詩篇 49 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

倚靠財產个愚戇 可拉後代个詩，交給聖歌隊長。

1萬民啊，你等愛聽好！

世間人啊，愛留心聽！

2無論係貧賤富貴，

攏總愛側耳來聽！

3𠊎个嘴愛講智慧个話；

𠊎个心愛想通達个事。

4𠊎个耳公愛細膩聽比喻；

𠊎愛彈琴解明𠊎个鈴仔。

5在災難臨到該兜日仔，

仇敵圍困等𠊎該樣時，

𠊎做麼介愛使著驚呢？

6佢等不過係靠錢財个人，

所誇口个係財產多定定。

7人無法度贖轉自家个兄弟，

也無法代佢納贖價給上帝。

8生命个贖價極貴，

絕對無人付得出。

9想愛永遠生生，毋使死，

這係絕對無可能个事。

10愛看清楚，有智慧个人會死，

戇戇檔檔个人共樣會滅亡；

佢等攏總將錢財留給別人。

11雖然佢等識有自家个土地，

總係永遠个家係塚埔 定定；

佢等愛一直留在塚埔底背。

12人雖然住在尊貴中還係會死；

佢㧯會死个禽獸無麼介分別。

13看啊，倚靠自家个人，佢等个命運樣般；

看該兜誇口得到財產个人結局樣般 。

14佢等㧯羊仔一樣註定落陰間；

「死亡」定著會成做佢等个牧者。

佢等个身屍也愛在塚埔底背糜掉；

天光个時，該兜義人就愛贏過佢等。

15總係上帝會救贖𠊎个靈魂；

佢會救𠊎脫離陰間个權勢。

16看到人發財、緊來緊有錢，

毋使發咄愕；

17佢死个時麼介也帶毋走；

錢財也毋會跈佢下去。

18就算佢一生人盡得意，

名聲受到別人个稱讚，

19佢最後還係愛跈祖先去，

永遠無法度再看到光明。

20人雖然住在尊貴中，若無覺悟，

佢㧯會死个禽獸無麼介分別。