1上主㧯耶利米講會做天旱。佢講：
2 猶大盡悲哀，城市冷落。
人民坐在地上哀傷；
耶路撒冷嘶天噦地大噭。
3有錢人派僕人去打水；
佢等到囤水窟總係尋無水，
就帶等空水罐仔轉來。
佢等幪等頭那，
感覺盡失望，毋知樣般正好。
4天毋落水，地燥到裂掉；
耕種人揇等頭那，失望到無葛無煞。
5野地个鹿乸會㧒掉正𫱔个細鹿仔，
因為無草好食。
6野驢企在光光个山頂，
像野狗恁樣嘴擘擘緊透大氣；
因為無草好食，
牠兜肚飢到目珠花花。
7𠊎个子民向𠊎呼求：
「上主啊，𠊎等个罪做證來告𠊎等，
總係因為你个名，
這下還係求你施行拯救。
𠊎等常常犯罪離開你；
𠊎等確實得罪你。
8你係以色列惟一个希望，
係𠊎等堵到災難時个救主。
你在𠊎等當中做麼介像生份人？
像過路个旅客入來歇一夜定定？
9做麼介你像人著驚到發咄愕，
像無能力救人个戰士？
總係，上主啊，𠊎等知，
你確實有㧯𠊎等同在！
𠊎等係你个子民；
求你毋好㧒掉𠊎等。」
10上主恁樣講：「這兜人當好亂行，隨自家个意思流浪。所以，𠊎當惱佢等；𠊎愛記得佢等个罪過，責罰佢等个罪惡。」
11上主對𠊎講：「你毋使為這兜人求福氣。
12就算佢等禁食，𠊎也毋聽佢等个求喊；就算佢等獻燒化祭㧯素祭，𠊎也毋接受。𠊎反轉愛用戰爭、飢荒、㧯發瘟來消滅佢等。」
13𠊎就講：「唉！至高个上主啊，該兜先知預言講毋會有戰爭，毋會有飢荒。佢等講，你應許愛俾𠊎等在自家个土地上享受太平。」
14總係上主應講：「該兜先知借𠊎个名講花撩。其實，𠊎並無派佢等，也無命令佢等，連向佢等講過一句話也無。佢等个異象係虛假个；佢等个卜卦係無效个；佢等个預言係佢等自家个戇想。
15所以，𠊎 — 上主恁樣㧯你講：𠊎愛對付該兜毋係𠊎派个假先知；佢等借𠊎个名預言這地方毋會有戰爭，毋會有飢荒。總係𠊎愛用戰爭㧯飢荒來消滅該兜先知。
16該兜聽佢等講預言个人也會受到共樣个結局。佢等个身屍㧯佢等𡜵娘子女个身屍，全部會被人㧒在耶路撒冷个街路，無人埋葬。𠊎愛佢等為自家个罪惡受到報應。」
17上主吩咐𠊎向人民講起𠊎个憂傷：
𠊎个目汁日夜緊流！
𠊎噭無停！
因為𠊎所惜个同胞著傷；
佢等受盡大个打擊。
18𠊎到野外，
看到被刀仔㓾死个身屍；
𠊎入到城肚，
看到餓到半生死个人民。
先知㧯祭司在國內出出入入照常工作，
總係毋知自家無閒麼介 。
人民懇求上主19上主啊，你敢完全㧒掉猶大係麼？
你敢盡惱錫安个人民？
你做麼介打𠊎等，
打到無好醫？
𠊎等希望平安，總係看毋到好光景；
𠊎等希望得到醫治，反轉堵到著驚。
20上主啊，𠊎等確實有得罪你。
𠊎等承認自家个罪過，
也承認𠊎等祖先个罪惡。
21求你記得你自家个應許，毋好㧒掉𠊎等；
毋好俾人看輕你榮光个寶座 — 耶路撒冷；
求你毋好廢掉你㧯𠊎等所立个約。
22列國虛空个偶像敢會使天落水？
天空自家會降甘霖麼？
上主 — 𠊎等个上帝啊，
有能力做這兜事个，敢毋係你定定！
𠊎等个希望在你，
因為這一切只有你正會做。
Who We AreWhat We EelieveWhat We Do
2025 by iamachristian.org,Inc All rights reserved.
