1上主講：
在該日，
𠊎愛使猶大㧯耶路撒冷重新得到繁榮。
2𠊎愛召集萬國萬民下到「審判山壢」；
𠊎愛因為佢等加給𠊎子民个傷害審判佢等。
佢等識將以色列人分散到列國，
分割𠊎个土地以色列。
3佢等抽籤決定，
看麼人得到捉來个人。
佢等用細阿哥仔換妓女，
賣細阿妹仔去買酒啉。
4「泰爾、西頓，㧯非利士逐所在个人啊，你等想愛向𠊎報復係麼？若係想，𠊎當遽就會向你等報復。
5你等搶𠊎个金銀，搶𠊎个財寶，將它兜放在你等个神廟肚。
6你等將猶大㧯耶路撒冷个人民賣給希臘人，使佢等遠離自家个家鄉。
7𠊎黏時愛將佢等對你等賣去个所在帶轉來。𠊎愛照你等款待佢等个方法對付你等。
8𠊎愛將你等个子女賣給猶大人；佢等會將你等个子女轉賣給遠方个示巴人。𠊎係上主；𠊎恁樣宣佈了。」
9你等愛在萬國中宣佈：
準備相㓾！
召集戰士！
集合所有个軍兵前進！
10愛將犁頭打做刀劍；
將鐮仔打做槍。
較軟弱个人也愛做勇士出陣。
11四圍个列國啊，遽遽來！
集合在山壢中。
上主啊，求你派你个軍隊攻打佢等！
12萬國愛準備好，
到「審判山壢」來。
𠊎 — 上主愛坐在該位，
審判四圍个列國。
13佢等罪大惡極；
所以，愛斬死佢等，
像收割五榖恁樣。
愛踏糜佢等，
像葡萄在酒槽被人踏糜，
直到酒槽淰出來。
14千千萬萬个人聚集在「審判山壢」；
因為上主審判个日仔就愛在該位臨到。
15日月無光，
星辰烏暗。
上主愛賜福給佢个子民16上主對錫安像獅仔吼吼滾，
對耶路撒冷像雷公𠾐𠾐滾。
天㧯地全部愊愊掣，
總係上主愛保護佢个子民，
做以色列人个避難所。
17上主講：
該時你等就會知𠊎係上主 — 你等个上帝。
𠊎住在𠊎个聖山錫安；
耶路撒冷會成做聖城，
外族人永遠毋會再佔領它。
18到該時，大山會滴酒，細山流乳；
猶大个溪水會流無停。
有泉水愛對上主个聖殿流出來，
淹到什亭山壢。
19 埃及會成做荒地；
以東會成做曠野。
因為佢等識用強暴對付猶大，
流無罪人个血。
20-21𠊎愛為受害个人報仇 ；
𠊎絕對毋會放過該兜兇犯。
總係猶大永遠會有人住，
耶路撒冷會代代相傳。
𠊎 — 上主愛住在錫安山。
Who We AreWhat We EelieveWhat We Do
2025 by iamachristian.org,Inc All rights reserved.
