以斯拉記 8 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

轉來耶路撒冷个人

1下背係亞達薛西做皇帝个時，㧯𠊎 — 以斯拉共下對巴比倫轉來耶路撒冷該兜宗族領袖个名；佢等个族譜記在下背：

2-14 革順 — 非尼哈宗族；

但以理 — 以他瑪宗族；

示迦尼个孻仔哈突 — 大衛宗族；

撒迦利亞 — 巴錄宗族，共下个男人一百五十儕 (有佢等个家譜)；

西拉希雅个孻仔以利約乃 — 巴哈‧摩押宗族，共下个男人兩百儕；

雅哈悉个孻仔示迦尼 — 薩土

宗族，共下个男人三百儕；

約拿單个孻仔以別 — 亞丁宗族，共下个男人五十儕；

亞他利雅个孻仔耶篩亞 — 以攔宗族，共下个男人七十儕；

米迦勒个孻仔西巴第雅 — 示法提雅宗族，共下个男人八十儕；

耶歇个孻仔俄巴底亞 — 約押宗族，共下个男人兩百十八儕；

約細斐个孻仔示羅密 — 巴尼

宗族，共下个男人一百六十儕；

比拜个孻仔撒迦利亞 — 比拜宗族，共下个男人二十八儕；

哈加坦个孻仔約哈難 — 押甲宗族，共下个男人一百一十儕；

以利法列、耶利㧯示瑪雅 — 亞多尼干宗族，共下个男人六十儕 (佢等較慢倒轉來)；

烏太㧯撒布 — 比革瓦伊宗族，共下个男人七十儕。

以斯拉為聖殿召集利未人

15𠊎召集全部民眾聚集在該條流向亞哈瓦城个河壩滣；𠊎等在該位安營三日。𠊎發現民眾當中有祭司，總係無利未人。

16𠊎就召集該兜領袖：以利以謝、亞列、示瑪雅、以利拿單、雅立、以利拿單、拿單、撒迦利亞、米書蘭，並教師：約雅立㧯以利拿單。

17𠊎派佢等去見迦西斐雅地區个領袖易多，請佢㧯佢个同工 — 聖殿工人，派兜人給𠊎等，來聖殿事奉上帝。

18因為𠊎等个上帝施恩幫助𠊎等，佢等派一個盡有才能个以色列人示利比。佢係屬抹利宗族个利未人；佢个孻仔㧯兄弟共十八儕也㧯佢共下來。

19佢等也派來米拉利宗族个哈沙比雅㧯耶篩亞，共下个親屬二十儕。

20另外，又有兩百二十个聖殿工人共下來；這兜人个祖先係大衛王㧯佢該兜大臣派去協助利未人个。佢等个名全部列在名單頂高。

以斯拉帶領人民禁食祈禱

21在亞哈瓦河壩滣，𠊎命令大家禁食，在𠊎等上帝面前謙卑，求佢在路途中𢱋𠊎等，保護𠊎等㧯𠊎等个子女，並𠊎等所有个財物。

22𠊎感覺，向皇帝請求一隊騎兵透路保護𠊎等，使𠊎等無受敵人攻擊，這係盡見笑个事；因為𠊎識對皇帝講，𠊎等个上帝施恩幫助一切信靠佢个人，總係該兜違背佢个人，佢就發譴責罰。

23所以，𠊎等禁食，祈求上帝保護𠊎等；佢聽𠊎等个祈禱。

為聖殿獻个禮物

24對祭司領袖當中，𠊎選示利比、哈沙比雅㧯佢等个兄弟十個人。

25然後，𠊎將皇帝㧯佢个參謀、官員，㧯以色列人為上帝聖殿所獻出个金銀㧯用品，全部秤好交給祭司。

26-27以下就係𠊎交給佢等个東西：

銀仔 — 二十二公噸，

銀做个用品 — 三千四百公斤，

金仔 — 三千四百公斤，

二十隻金碗 — 八點四公斤，

兩隻當金个銅碗，價值㧯金碗共樣。

28𠊎對佢等講：「你等在上主 — 你等祖先上帝个眼中係聖个；所有甘心獻給佢个金器、銀器也係聖个。

29你等愛小心看守它兜，一直到上主个聖殿。到該位，愛在祭司房間內秤過，交給祭司㧯利未人个領袖，並耶路撒冷个以色列人領袖。」

30所以，祭司㧯利未人負責看守這兜金仔、銀仔㧯用品，將它兜帶到耶路撒冷𠊎等上帝个聖殿。

轉去耶路撒冷

31正月十二，𠊎等離開亞哈瓦河，向耶路撒冷去。路途中，𠊎等上帝个手保護𠊎等，救𠊎等無被敵人㧯埋伏个人攻擊。

32到耶路撒冷，𠊎等歇睏三日。

33第四日，𠊎等就到上帝个聖殿去，將金仔、銀仔、㧯用品秤好，將它兜轉交給烏利亞个孻仔 — 米利末祭司。㧯佢共下个，還有非尼哈个孻仔以利亞撒，兩個利未人 — 耶書亞个孻仔約撒拔㧯賓內个孻仔挪亞底。

34逐件東西全部算過，秤好，同時做詳細个記錄。

35所有流亡轉來个人全部帶等祭物，做燒化祭獻給以色列个上帝。佢等為全以色列人獻十二隻牛牯，九十六隻綿羊牯，七十七隻細綿羊，又為潔淨自家个罪獻十二隻山羊牯。這兜頭牲全部做牲儀燒掉獻給上主。

36佢等又將皇帝个信仔交給河西省省長㧯該兜官長；該兜領袖就幫助人民，供給上帝聖殿敬拜个需要。