詩篇 75 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

審判个主上帝 亞薩个詩歌，交給聖歌隊長，調用莫敗壞。

1上帝啊，𠊎等感謝你，

𠊎等感謝你！

𠊎等宣揚你个偉大，

講說 你奇妙个作為！

2上帝講：「𠊎已經定好日仔；

𠊎愛用公當來施行審判。

3雖然地㧯住在地上个人搖動，

𠊎還愛使地个根基得到堅固。

4𠊎喊驕傲个人莫驕傲；

𠊎喊兇惡个人莫好鬥；

5莫自大頭昂昂，

莫講話頸橫橫。」

6人得到高升毋係對東方抑係西方來个，

也毋係對曠野來个；

7唯有上帝斷定一切；

佢使一儕降下，一儕高升。

8上主个手中拿等一隻杯仔，

底背裝滿佢大發譴个釅酒；

佢倒出來，

世上邪惡个人攏總愛啉，

一直啉到最後一滴。

9總係𠊎愛宣揚雅各个上帝；

𠊎愛唱歌頌讚佢直到永遠。

10佢愛打碎壞人个權勢；

佢愛加添義人个力量。