1天光个時，所有个祭司長㧯民間个長老參詳，愛害死耶穌。
2佢等將耶穌䌈起來，解送，交給羅馬總督彼拉多。
猶大个死(使徒行傳 1:18-19)3出賣耶穌个猶大看到耶穌受定罪，就後悔，將三十隻銀錢拿去還祭司長㧯長老，
4講：「𠊎出賣無罪个人，害佢死；𠊎有罪了！」佢等應講：「這係你自家个事情，㧯𠊎等有麼介關係？」
5 猶大就將銀錢㧒在聖殿肚，出去吊頸自殺。
6祭司長將錢拈起來，講：「這係血錢，拿來放落奉獻箱係違法个。」
7參詳个結果，佢等同意拿這錢去買燒缶師傅个地，做埋葬外鄉人个墓地。
8恁樣，到今晡日大家還喊該地做「血田」。
9這件事个經過，應驗先知耶利米所講个話：「佢等拿三十隻銀錢，就係以色列人所同意為佢付出个價錢，
10去買燒缶師傅个地；這係照主所命令𠊎个。」
耶穌在彼拉多面前受審判(馬可 15:2-5；路加 23:3-5；約翰 18:33-38)11耶穌企在總督面前，總督問佢講：「你係猶太人个王麼？」
耶穌應講：「這係你講个。」
12祭司長㧯長老告佢个時，佢全部毋應。
13所以彼拉多對佢講：「佢等告你恁多事，你無聽到係麼？」
14耶穌還係毋應，連一句話也無講；總督感覺非常个奇怪。
耶穌被人判死刑(馬可 15:6-15；路加 23:13-25；約翰 18:39–19:16)15逐年𨃟過節，總督會照慣例為大眾放一個佢等所愛个囚犯。
16該時，堵好有一個出名个囚犯，安到耶穌‧巴拉巴
。17所以，大眾聚集个時，彼拉多問佢等：「你等愛𠊎為你等放㖠個呢？耶穌‧巴拉巴呢？抑係該稱做基督个耶穌呢？」
18彼拉多明明知佢等係因為嫉妒正將耶穌交給佢个。
19 彼拉多開庭个時，佢个𡜵娘派人來見佢講：「你千萬莫插該義人个事；𠊎昨暗晡在夢中因為佢受盡多苦。」
20祭司長㧯長老教唆大眾來要求釋放巴拉巴，處死耶穌。
21所以，總督問佢等講：「這兩個人當中，你等愛𠊎為你等放㖠個呢？」佢等就應講：「巴拉巴！」
22 彼拉多又問佢等講：「恁樣，該稱做基督个耶穌，𠊎愛樣般處理佢哪？」
佢等全部講：「將佢釘十字架！」
23 彼拉多問講：「佢到底做麼介壞事？」
佢等還較大聲喊講：「將佢釘十字架！」
24 彼拉多看到這個情形，知加講也無用，反轉會惹起暴動，就拿水在眾人面前洗手，講：「流這人 个血，毋係𠊎个罪，你等自家負責！」
25眾人齊聲講：「這人个血債，算在𠊎等㧯𠊎等子孫个身上！」
26 彼拉多就放巴拉巴給佢等，又命令將耶穌鞭打，然後交給人去釘十字架。
兵仔㩢耍耶穌(馬可 15:16-20；約翰 19:2-3)27總督个兵仔將耶穌帶入總督府；全隊集合在耶穌周圍。
28佢等脫下耶穌个衫，㧯佢著一領朱紅色个長袍，
29用竻仔編一頂冕旒，㧯佢戴等，拿一支藤條放在佢个右手，跪在佢面前㩢耍佢，講：「猶太人个王萬歲！」
30佢等又用口潾呸佢，拿藤條緊打佢个頭那。
31㩢耍煞，佢等將佢身上个長袍脫下來，㧯佢著自家个衫，然後帶佢出去釘十字架。
耶穌被人釘十字架(馬可 15:21-32；路加 23:26-43；約翰 19:17-27)32佢等出來个時，堵到一個古利奈人，名安到西門，就強迫佢代耶穌擎十字架。
33佢等來到一個地方，安到各各他，意思就係「頭那殼个山頭」。
34佢等拿摻苦膽个酒給耶穌啉；耶穌一下，就毋啉。
35佢等就將耶穌釘在十字架頂，又抽籤仔來分佢个衫，
36然後坐在該位掌等佢。
37佢等在佢頭那个頂高安一垤牌仔寫等佢个罪名：「這係猶太人个王耶穌。」
38佢等又將兩個強盜同耶穌共下釘十字架，一個在佢个右片，一個在佢个左片。
39對該位經過个人侮辱耶穌，搖頭，
40講：「你這愛拆聖殿，三日內將它重建起來个！你若係上帝个孻仔，救你自家，對十字架頂下來啊！」
41祭司長、經學教師，㧯長老也共樣恥笑佢，講：
42「佢救了別人，卻無法度救自家！佢係以色列个王噢！若係佢這下對十字架頂下來，𠊎等就信佢！
43佢倚靠上帝；若係上帝合意佢，這下就可以救佢；因為佢識講：『𠊎係上帝个孻仔。』」
44同耶穌共下釘十字架个強盜也恁樣嘲謔佢。
耶穌个死(馬可 15:33-41；路加 23:44-49；約翰 19:28-30)45當晝个時，大地烏暗，約有三點鐘久。
46到下晝三點鐘个時，耶穌大聲喊講：「以利！以利！拉馬撒巴各大尼？」意思係講：「𠊎个上帝，𠊎个上帝，你做麼介放掉𠊎？」
47塍頭企等个人，有兜聽到就講：「這個人喊以利亞！」
48其中有一儕黏時走過去，拿一垤海綿浸酸葡萄酒，然後䌈在藤條頂，愛拿給佢啉。
49其他个人講：「等一下仔，𠊎等看以利亞會來救佢無！」
50耶穌又大喊一聲，就斷氣死掉。
51這時，掛在聖殿肚个布簾，對頂高到底下裂做兩析。大地震動，磐石裂開，
52墳墓也開了，盡多過身个聖徒返生過來。
53耶穌復活以後，佢等離開墳墓，入去聖城；盡多人看到佢等。
54掌耶穌个軍官㧯兵仔看到地動並所發生个事，就大著驚，講：「佢實在係上帝个孻仔！」
55在該位，還有好多婦人家遠遠企等看；姖等係對加利利跈等耶穌來服事佢个。
56其中有抹大拉个馬利亞，雅各㧯約瑟个阿姆馬利亞，並西庇太兩個孻仔个阿姆。
耶穌个安葬(馬可 15:42-47；路加 23:50-56；約翰 19:38-42)57臨暗仔，有一個亞利馬太个有錢人來；佢个名安到約瑟，也係耶穌个學生。
58佢去見彼拉多，要求收殮耶穌个遺體；彼拉多就吩咐將耶穌个遺體交給佢。
59約瑟領到遺體後，用淨浰个麻紗包好，
60放在佢新做个墳墓底背；這墳墓係佢對石壁鑿成个。佢又將一垤大石頭碾過來，塞等墓門，然後正離開。
61該時，抹大拉个馬利亞㧯另外一個馬利亞坐在墳墓對面。
掌墳墓个衛兵62第二日，就係禮拜六个朝晨 ，祭司長同法利賽人共下去見彼拉多，
63講：「大人，𠊎等記得該隻騙人个落仔還生个時節識講：『三日後𠊎愛復活。』
64所以，請你下令嚴嚴掌好墳墓，直到第三日，驚怕佢个學生來將佢偷走，然後去對人講：『佢對死復活了。』若係恁樣，後來个欺騙會比先前个還較厲害。」
65 彼拉多對佢等講：「帶一隊衛兵去，照你等所知妥當个辦法去掌！」
66佢等就去，用盡辦法嚴守墳墓，在石頭頂加封條，又命令衛兵掌等。
Who We AreWhat We EelieveWhat We Do
2025 by iamachristian.org,Inc All rights reserved.
