撒母耳記下 9 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

大衛㧯米非波設

1有一擺，大衛問：「掃羅家族還有還生个人麼？若係有，𠊎愛因為約拿單个緣故好好款待佢。」

2 掃羅家有一個僕人安到洗巴；有人喊佢去見大衛。王問佢講：「你係洗巴麼？」

洗巴應講：「係！請國王吩咐。」

3王又問：「掃羅家族還有還生个人麼？𠊎愛照上帝个慈愛款待佢。」

洗巴應王講：「還有約拿單一個孻仔；佢係兩腳跛腳个人。」

4王問：「佢在㖠位？」

洗巴應王講：「佢在羅‧底巴，亞米利个孻仔瑪吉个屋下。」

5所以大衛王派人將佢接來。

6 掃羅个孫仔 — 約拿單个孻仔米非波設來到个時，就恭恭敬敬伏在大衛面前。大衛喊佢：「米非波設！」佢應講：「國王，請吩咐。」

7 大衛講：「毋使驚，𠊎會因為若爸約拿單个緣故好好款待你。𠊎會將若公掃羅个土地全部還給你；你也做得常常㧯𠊎共桌食飯。」

8 米非波設又向大衛伏拜，講：「若僕人像係一條死狗，還得到王恁樣恩待！」

9王喊掃羅个僕人洗巴過來，對佢講：「𠊎愛將掃羅㧯厥家族所有个財產賜給若主人个孫仔米非波設。

10你㧯你該兜孻仔、奴僕，全部愛為若主人掃羅个家族耕田，將收成拿來給佢等食 ，米非波設本人愛常常做𠊎个人客、㧯𠊎共桌食飯。」 (洗巴有十五個孻仔，二十個奴僕。)

11 洗巴應王講：「吾主吾王个命令，僕人全部會遵照去辦。」

恁樣，米非波設常常㧯大衛

共桌食飯，就像係王个孻仔。

12米非波設有一個孻仔還細，安到米迦。所有洗巴屋下个人全部成做米非波設个奴僕。

13恁樣，兩腳跛腳个米非波設就住在耶路撒冷，常常㧯王共桌食飯。