以西結書 31 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

用亞述个淪陷警告埃及

1𠊎等被人捉去个第十一年三月初一，上主㧯𠊎講話。

2佢講：「人子啊，你愛向埃及王㧯佢所有个人民講：

你恁強大噢！

麼人做得來㧯你比呢？

3你看亞述王以前像生在黎巴嫩个香柏樹，

樹桍盡靚、樹葉拶拶，

樹尾高到堵天。

4泉水滋潤它；

地下水使它緊來緊大。

河壩水流到樹林肚，

分岔出來个細坑水，

滋潤樹林肚个逐頭樹。

5所以，它生到比其他个樹仔較高；

它个樹枝又長又密。

6飛鳥在樹頂做藪；

野獸在樹下生產；

各國在它樹影下安居。

7啊，樣般恁靚个大樹！

樹生到高高，樹桍伸到長長；

樹根釘到深深，深到地底下个水源。

8上帝園肚个香柏樹無比它較高；

松樹个樹桍無比它較長；

楓樹个枝桍也無贏過它。

上帝園肚个樹仔無一頭像它恁靚。

9𠊎使它生到盡靚，枝葉茂盛；

上帝伊甸園肚个樹仔全部嫉妒它。

10「所以，𠊎 — 至高个上主恁樣講：因為這頭樹恁高大，樹尾高到堵天，它越高大就越驕傲，

11𠊎就將它交給列國中最強个統治者來辦它；𠊎因它个罪惡已經逐走它。

12當惡个外國人斬斷它，㧒掉它，使大樹桍散在國內个山頂㧯山壢中，細樹枝聚集在該地方个河壩滣。在它樹影下住个各國人民全部離開。

13空中个飛鳥停在橫掉个樹仔頂高落腳；野獸睡在樹桍中。

14以後，無論水源樣般充足，毋會再有一頭樹會生到恁高恁驕傲，樹尾高到堵天。所有个樹仔一定會燥掉，像人會死掉，落到陰間，㧯死人共下。」

15至高个上主恁樣講：「該頭大樹落陰間个時，𠊎喊地底下个水浸掉它，表示哀傷。𠊎塞掉江河，使溪水停流。𠊎使烏暗遮等黎巴嫩山，使樹林肚个樹仔全部燥掉。

16𠊎將它㧒入陰間，它跌落去个響聲震動列國。已經在陰間个樹仔，就係伊甸園个樹仔㧯黎巴嫩水分充足、盡好个樹仔，全部因為它跌落去得到安慰。

17這兜樹仔全部㧯該頭大樹落到陰間，㧯該兜被刀㓾死个人共下。所有識住在該頭樹影下个人全部被人捉到各國去 。

18「埃及王啊，伊甸園肚个樹仔全部無比你較高較靚。總係，你愛㧯伊甸園肚个樹仔共樣落到陰間，㧯該兜無敬虔、被刀㓾死个人共下。

「這就係埃及王㧯佢人民个結局。」至高个上主恁樣宣佈了。