何西阿書 8 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上主責備以色列人拜偶像

1上主講：「愛歕羊角啊！敵人就像鷹鳥攻擊𠊎个土地。𠊎个子民已經違背𠊎㧯佢等所立个約，違犯𠊎个教訓。

2雖然佢等向𠊎哀求，講：『𠊎等个上帝啊，𠊎等以色列人認識你！』

3總係佢等拒絕良善。所以，敵人一定會逐到佢等。

4「佢等毋照𠊎个意思選立君王；指派領袖乜無得到𠊎个同意。佢等用金銀製造偶像，害自家惹來滅亡。

5撒馬利亞人啊，𠊎愛抨掉你等所拜个金牛像；𠊎對拜偶像个人大發譴。你等愛到幾時正會豁掉偶像呢？

6以色列个師傅製造偶像，總係這偶像並毋係神。撒馬利亞个金牛像一定愛打到碎碎。

7佢等委个係風，收个係狂風！發芽總係毋會打子，也磨毋出麵粉；就算做成麵粉，也會被外國人食掉。

8以色列被人食掉；這下在列國中，像爛掉个缶仔，無半些路用。

9佢等像野驢恁硬頸行自家个路；佢等去靠亞述國，又拿錢收買外國來保護佢。

10總係𠊎愛將佢等全部集共下，刑罰佢等。當亞述个大王壓迫佢等个時，佢等就愛漸漸衰弱。

11「為到愛除掉自家个罪，以色列人起盡多祭壇；祭壇越多，反轉犯越多罪。

12𠊎為佢等寫盡多法律，總係佢等全無看重，就像㧯佢等無關係共樣。

13佢等向𠊎獻祭，貪食祭過个肉；總係𠊎 — 上主毋單淨無歡喜這兜祭，反轉愛記得佢等个罪，責罰佢等；𠊎愛將佢等送轉埃及。

14「以色列人起當多王宮，總係毋記得佢等个創造主；猶大人起當多堅固个城堡。總係𠊎愛降火燒掉佢等个王宮㧯城堡。」