約翰一書 5 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

贏過世界

1凡信耶穌係基督个，全部係上帝所𫱔个。人若敬愛該做阿爸个，就一定會惜佢个子女。

2𠊎等若敬愛上帝，又遵守佢个命令，恁樣就知𠊎等惜佢个子女。

3𠊎等遵守上帝个命令，這就係敬愛上帝；佢个命令並毋係恁難遵守，

4因為凡上帝所𫱔个就贏過世界。使𠊎等贏過世界个，係𠊎等个信心。

5麼人能贏過世界呢？唯有信耶穌係上帝个孻仔个人！

見證耶穌基督

6耶穌基督降世係通過洗禮个水㧯犧牲个血；毋單淨係通過水，係通過水㧯血。聖靈也親自見證這係真實个，因為聖靈就係真理。

7-8聖靈、水㧯血，這三樣攏總做見證，三樣都同意。

9既然𠊎等接受人个見證，上帝个見證還較有力；因為這見證係上帝為佢个孻仔做个。

10所以，麼人信上帝个孻仔，麼人心中就有這個見證；麼人毋信上帝，就係看上帝做講花撩个，因為佢毋信上帝為佢个孻仔所做个見證。

11這見證就係：上帝賜𠊎等永遠个生命，這生命个源頭就係佢个孻仔。

12人有上帝个孻仔就有這生命；人無上帝个孻仔就無這生命。

永遠个生命

13𠊎寫這兜給你等，係愛你等知，你等信上帝个孻仔个人有永遠个生命。

14𠊎等在上帝面前好膽無驚；因為𠊎等確實知，𠊎等若照佢个旨意求，佢就會聽𠊎等。

15既然𠊎等知佢會聽𠊎等一切个祈求，𠊎等就知𠊎等對佢所求个，已經得到。

16若有人看到兄弟姊妹犯了毋會致到死个罪，佢應當求上帝，上帝會賜生命給佢个兄弟姊妹。這係指該兜犯了毋會致到死个罪个人講个。總係，有會致到死个罪；𠊎毋係講愛為這個罪祈禱。

17一切不義个行為攏總係罪，總係也有毋會致到死个罪。

18𠊎等知，凡上帝所𫱔个就毋會繼續犯罪；上帝个孻仔保守佢，該隻邪惡者也害佢毋到。

19𠊎等知，雖然全世界攏總住在該隻邪惡者个轄制之下，𠊎等還係屬上帝。

20𠊎等知，上帝个孻仔已經來了，佢賜𠊎等理解力，使𠊎等認識真神。𠊎等在真神个生命底背，就係在佢个孻仔耶穌基督个生命底背。佢就係真神，就係永遠个生命。

21親愛个子女啊，你等愛遠遠離開偶像！