1下背係上主給比土珥个孻仔約珥个信息。
2長老 啊，你等愛聽，
猶大个人民啊，愛注意聽！
你等个時代抑係祖先个時代敢有發生過這種事？
3㧯你等个子女講，
好俾佢等㧯佢等个子女講，
世世代代，流傳下去。
4一群一群个草蜢停在農作物面頂。
大草蜢食賸个，細草蜢來食；
細草蜢食賸个，幼草蜢來食；
幼草蜢食賸个，禾蝦來食。
5酒醉个人啊，好醒過來噭了！
好酒个人啊，愛哀傷大噭！
因為焗新酒个葡萄無半滴了。
6有一隊草蜢侵犯𠊎等个土地。
牠兜當強大，多到無法度算；
牠兜个牙齒像獅仔个牙齒恁利。
7牠兜毀壞𠊎等个葡萄樹，
將無花果樹食到光光。
牠兜連樹梗个皮也喫到淨淨，
使樹梗變做白白。
8你等愛盡噭！
像細妹仔因為未婚夫死掉著麻衫大噭。
9聖殿肚毋會再有五榖㧯美酒，
祭司因為無祭物好獻給上主來悲傷。
10田園荒掉，
大地淒涼；
因為五榖毀壞，
全無新酒，
橄欖油也當欠。
11耕種人啊，你等會當失望！
掌葡萄園个啊，你等會大噭！
因為大麥、小麥，
㧯所有農作物全部毀壞淨淨。
12葡萄樹、無花果樹燥掉；
石榴樹、棕樹、蘋果樹
㧯所有个果樹全部燥掉；
人个喜樂也全部消失了。
13在祭壇服事个祭司啊，
你等愛著麻衫大噭！
愛入聖殿歸暗晡噭吱！
因為毋會再有五榖、美酒好獻給你等个上帝了。
14你等愛宣佈禁食，舉行神聖个聚會！
愛召集該兜長老㧯猶大所有个人民，
進入上主 — 你等上帝个聖殿，
向上主哀求！
15上主个日仔會到了！
全能者愛降災難了！
該日仔係樣般得人驚啊！
16農作物在𠊎等眼前毀壞了；
𠊎等上帝个聖殿無歡喜快樂。
17種子全部在泥塥肚糜掉了，
無榖好囤；
榖倉全部無用掉去了。
18頭牲盡噦盡噭。
牛群衝上衝下，
因為尋無草好食；
羊群也共樣受苦。
19上主啊，𠊎向你哀求，
因為火燒掉野地个草場，
火焰燒淨田園个樹仔。
20野獸也向你嘴勺勺；
因為河壩水燥掉，
火將草場燒掉了。
Who We AreWhat We EelieveWhat We Do
2025 by iamachristian.org,Inc All rights reserved.
