彼得前書 4 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

生活个改變

1基督既然在肉體受苦，你等就應該用這種个心志裝備自家，因為在肉體上受過苦个人，佢同罪惡个關係已經切斷；

2從今以後，你等在世間个日仔愛順從上帝个旨意，毋好再被人个慾望轄制。

3往時你等浪費光陰，行無信个人歡喜做个各種事，像淫亂、私慾、好酒、宴樂、酒醉，㧯上帝法律所禁止个拜偶像。

4這下你等無再㧯佢等共樣過該種放蕩、無節制个生活，佢等感覺盡奇怪，就侮辱你等。

5總係，佢等一定愛對該審判生人㧯死人个上帝交帳。

6就係因為恁樣，福音也識傳給死人，給佢等雖然肉體同其他个人共樣受審判，總係靈魂有好像上帝恁樣生等。

做上帝恩賜个管家

7萬事个結局近了。你等愛謹慎節制，警醒祈禱。

8最重要个係愛彼此熱誠相惜，因為愛惜正能遮蓋多多个罪。

9大家愛彼此接待，毋好埋怨。

10既然逐儕係上帝各樣恩賜个好管家，就愛照所領受个種種恩賜，彼此服務。

11講道个，愛照上帝个話來講；服務个，愛用上帝所賜个力量來服務，使萬項事攏總通過耶穌基督歸榮光給上帝。願榮光㧯權能全部歸給佢，直到永永遠遠！阿愐。

忍受苦難个基督徒

12親愛个朋友啊，你等堵到像火恁樣个考驗，毋使奇怪，像係堵到麼介希奇个事。

13顛倒，你等應該將分擔基督个苦難看做快樂个事，好使你等在佢个榮光顯現个時來歡喜快樂。

14你等若因為跈基督受侮辱，就有福氣了！這表示榮光个聖靈，就係上帝个靈，在你等个身上。

15總係，你等當中若有人受苦，毋好係因為兇殺、做賊、犯刑事案件、抑係好插閒事。

16受苦若係因為做基督徒，毋好看做見笑，反轉愛因為有這個名稱來榮光上帝。

17審判个時節到了，上帝家內个子女愛先受審判。既然審判愛對𠊎等開始，恁樣，毋信從上帝福音个人結局會樣般呢？

18像聖經所講：

連義人得救也恁無簡單，

毋敬虔个罪人會樣般呢？

19所以，該兜因為上帝个旨意受苦个人，愛一心行善，將自家交託該信實个創造主。