以西結書 22 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

耶路撒冷个罪惡

1上主㧯𠊎講話；

2佢講：「人子啊，你有準備愛審判這座充滿兇手个城麼？你愛指出它所做一切邪惡个事。

3㧯這座城講，愛聽𠊎 — 至高个上主恁樣講：因為你㓾死盡多同胞，又拜偶像來打垃圾自家，所以你个死日到了。

4你犯㓾人个罪，又被你自家所造个偶像打垃圾了；恁樣你个死日近了，你个結尾到了。所以，𠊎愛使列國侮辱你，使萬邦恥笑你。

5遠近个國家全部會恥笑你个混亂㧯臭名。

6看啊，以色列个領袖㧯官長逐儕在你个當中亂用權柄、流人个血。

7城肚無人孝敬爺𡟓。有人欺負外族人，壓迫孤兒寡婦。

8你看輕𠊎个聖物，毋守𠊎个安息日。

9在你个當中有人常常講花撩，為到愛流人个血；有人在山頂食祭物；有人當好行淫亂；

10有人㧯阿爸个𡜵娘細姐同床；有人強強㧯經期中个婦人家同房；

11有人㧯別人个𡜵娘行姦淫；有人強姦自家个心舅；也有㧯共爺無共𡟓、共𡟓無共爺个姊妹亂倫。

12在你个當中有人被人請去㓾人；有人放高利貸，向同胞討利息，剝削佢等來發財。你完全將𠊎毋記得。」至高个上主恁樣宣佈了。

13「看啊，因為你貪不義个錢財，流人个血，𠊎愛出手攻擊你。

14𠊎㧯你算數个時，你還有勇氣麼？還有力量麼？𠊎 — 上主恁樣宣佈了。𠊎講過个，𠊎一定會實行。

15𠊎愛將你个人民逐散到各國，除掉你等个垃圾。

16在列國面前受到侮辱个時，你就會知𠊎係上主。」

上帝个大煉爐

17上主㧯𠊎講話；佢講：

18「人子啊，以色列人係一堆廢物。佢等就像煉銀个時在爐中分出來無用个銅、錫、鐵、鉛這兜廢物。

19所以，𠊎 — 至高个上主㧯佢等講，佢等就像該兜銀礦中个壞銅壞鐵共樣無麼介路用。𠊎愛將佢等集中在耶路撒冷，

20用𠊎个大發譴將佢等燒到鎔掉，就像人收集內肚有銀、銅、鐵、鉛、錫个礦石放在爐中來煉共樣。

21𠊎一定愛將佢等集中在耶路撒冷，用𠊎大發譴个火來煉佢等。

22佢等愛在耶路撒冷燒到鎔掉，就像銀仔个礦石在煉爐中燒到鎔掉。恁樣，佢等就會知𠊎 — 上主向佢等拚出大發譴。」

以色列領袖个罪惡

23上主㧯𠊎講話；

24佢講：「人子啊，愛㧯以色列人講，佢等个土地係無淨浰个。所以，𠊎愛發譴責罰佢等，毋落水給佢等。

25佢等个領袖 陰謀作惡，像吼吼滾个獅仔扯裂所捉到个動物。佢等㓾人，搶財寶，害盡多婦人家成做寡婦。

26祭司違背𠊎个法律，打垃圾𠊎个聖物。佢等無分別麼介係神聖个，麼介係世俗个，也無教人分別淨浰个㧯無淨浰个，又藐視𠊎个安息日。結果，以色列人全部毋尊敬𠊎。

27領袖㧯官長就像狼群扯裂所捉到个動物；佢等專門靠流人个血來發不義个錢財。

28先知為佢等遮罪惡，就像人用石灰水粉壁。佢等个異象係假个；佢等个預言係花撩个。佢等自家講係傳至高上主个話，其實，𠊎 — 上主並無對佢等講話。

29有錢人欺負、剝削、壞款待窮苦人，無公平對待外族人。

30𠊎在佢等當中尋，看有人會整城牆，企在城牆爛孔个所在麼？在𠊎發譴愛毀滅這城个時會好來保護它，總係𠊎連一個也尋毋到。

31所以，𠊎愛向佢等拚出𠊎个大發譴；𠊎大發譴个火愛將佢等燒到淨淨，照佢等所做个報應佢等。」至高个上主恁樣宣佈了。