1全能者做麼介毋將審判个日期定下來？
做麼介毋俾認識佢个人看到正義臨到？
2有兜人徙地界來侵佔土地，
有兜人搶別人个羊群來畜。
3有兜人搶走孤兒个驢仔，
強拉寡婦个牛仔做抵押。
4佢等強迫貧窮人離開大路，
該位个窮苦人嚇到走去囥。
5窮苦人像野驢恁樣，需要去曠野尋食物；
無其他地方好尋食物來畜佢等个子女。
6佢等無奈何在別人个田地收割 ，
在邪惡人个葡萄園摘葡萄來食。
7佢等打赤膊睡，因為無衫好著；
寒天个暗晡時，也無被骨好蓋。
8佢等在山頂被落大水涿到澇澇，
無麼介所在好閃，就尖在巖石下。
9壞人將寡婦揇等个細子搶走，
愛將窮苦人个子女捉去堵債。
10窮人到處流浪，無衫好著；
餓肚笥，還愛㧯人揹榖包。
11佢等在壞人个圍牆內榨橄欖油；
緊踏葡萄來做酒，還係無法止渴。
12城肚當多會死个人緊噌，
有重傷个人喊救命，
總係上帝毋搭該兜人个祈禱。
13有兜人毋接受光；
毋認識光明个道，
也毋行光明个路。
14天吂光㓾人个就䟘床；
佢等出去殺害窮苦人，
暗晡頭又出去做賊仔。
15淫亂个人等到斷烏，
又將自家个面遮等，
講：「莫俾人看到正好！」
16暗晡頭賊仔入人屋下，
佢等日時頭就囥起來，
因為佢等當驚看到光。
17暗晡時像係佢等个朝晨，
當慣勢得人驚个暗晡頭。
(瑣法開嘴講：)
18壞人一下仔就被大水打走。
佢等个土地受到上帝咒詛；
所以無人轉葡萄園去工作。
19就像天旱㧯熱天會將冰雪溶掉，
陰間也共樣會將犯罪个人吞掉。
20連𫱔佢等个阿姆也毋記得佢等；
佢等會被蟲仔食掉，無人記得佢等；
壞人會像樹仔斬斷掉。
21這係因為佢等壞款待寡婦，
對毋會𫱔个婦女全無愛心。
22上帝用佢个大能消滅強暴个人；
佢一行動，壞人个性命就無掉去。
23上帝暫時俾佢等平安，無愁煩，
總係佢个目珠看佢等个所行所做。
24該兜壞人雖然一時當興旺，
總係一下仔就像草木燥掉，
又像禾仔早慢愛被人割掉。
25麼人能證明這毋係事實？
麼人敢講𠊎个話無根據？
Who We AreWhat We EelieveWhat We Do
2025 by iamachristian.org,Inc All rights reserved.
