傳道書 2 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1𠊎心肚想：「來享樂試看啊！來享福噢！」總係這也係空虛。

2𠊎發現賭搞就像癲狂，享樂又有麼介利益呢？

3𠊎心肚想：「為到追求智慧个心願，𠊎愛用酒尋求快樂，啉到醉摸摸仔。」𠊎想，或者這係人生在世間短短个年日中最好个生活方式。

4𠊎就做大工程，為自家起屋，種葡萄。

5𠊎修建庭院果園，種各種果樹。

6𠊎挖水池，好俾樹仔淹水。

7𠊎有盡多奴僕㧯奴婢，有兜係買來个，有兜係在吾屋下出世个。𠊎比所有以前在耶路撒冷住過个人有還較多个牛羊。

8𠊎為自家積存金銀，又收集君王个財寶㧯逐省个財寶。𠊎有盡多唱歌个男女㧯細姐，𠊎想愛麼介，就有麼介。

9無毋著，𠊎盡強大，贏過所有以前在耶路撒冷住過个人；毋單淨恁樣，𠊎一直當有智慧。

10𠊎个目珠想愛看个，𠊎个心想愛享受个快樂，就盡命享受，無受約束。𠊎享受自家勞碌得到个快樂；這係𠊎應該得到个福份。

11總係，當𠊎回想自家个成就，想到所付出个勞碌，𠊎就知這一切係空虛，全部係捉風；在日頭下攏總無麼介價值。

12總講，一個君王所能做个，全部係頭擺个君王做過个。

所以，𠊎又重新思想智慧、癲狂、戇檔有麼介分別。

13恁樣，𠊎正看出智慧贏過戇檔，就像光明贏過烏暗。

14聰明人看清楚頭前个道路；戇檔人在烏暗中摸無路。總係，𠊎也知佢等个命運到尾全部共樣。

15𠊎心肚想：「戇檔人堵到个，𠊎也一定會堵到。𠊎盡聰明又有麼介好處呢？」𠊎心肚講：「無半滴，全部係空虛！」

16聰明人㧯戇檔人共樣，無人會久久紀念佢等；因為在將來个日仔，佢等全部會被人毋記得。無論係精係戇，全部會死掉。

17所以，𠊎盡惱人生；日頭下所做个事只有使𠊎操煩定定。全部係空虛，全部係捉風。

18日頭下勞碌得來个一切𠊎也盡惱；因為𠊎定著愛將得到个留給後來个人，

19該人係精係戇，麼人知？總係，佢會掌管𠊎在日頭下用勞碌、智慧得到个一切成果。這也係空虛。

20所以，𠊎對頭擺在日頭下个勞碌非常失望。

21人用佢个智慧、智識、本事所得來个，全部愛留下來，俾毋識勞碌个人承接。這也係空虛，盡無公平！

22人在日頭下个操心、辛苦、勞碌，到底有麼介價值呢？

23人一生所做个攏總係勞苦愁煩，連暗晡時也無平安。這也係空虛。

24人會食會啉，享受自家勞碌个成果，就算幸福了。𠊎看這也係上帝賞賜个。

25若毋係上帝賞賜个，麼人會有好食？麼人享受得到呢？

26上帝賜智慧、智識㧯喜樂給該兜得佢歡喜个人；總係佢使罪人操勞，將佢等所積存个全部留給該兜得佢歡喜个人。這也係空虛，也係捉風。