1毋使因為作惡个人發閼；
也毋使嫉妒行不義个人。
2佢等會像草當遽枯掉；
佢等會像植物盡遽燥掉。
3愛信靠上主，盡力行善；
愛在這地上安居樂業。
4愛因為上主歡歡喜喜；
佢就將你心所愛个賜給你。
5愛將萬事交託上主；
信靠佢，佢就會成全。
6佢會使你个正義像光恁樣發出；
佢會使你个公正像當晝个日頭。
7愛恬恬在上主面前，耐心等候佢；
毋好因為別人行事順利就發閼，
莫因為壞人个計謀成功來不平。
8毋好發譴，也毋好惱人；
莫發閼，免得你卻做壞。
9做壞个人一定會受剪除；
總係，仰望上主个人就能承接土地 。
10一𥍉目，壞人就消滅掉去；
你想愛尋佢等，也尋毋到。
11謙卑个人正能承接土地；
佢等會享受無窮个幸福！
12壞人謀害義人，
向佢咬牙切齒。
13總係主愛笑壞人，
因為佢知佢等个末日會到了。
14壞人挷出刀劍，拉開佢等个弓箭，
愛打橫窮苦个人，殺害正直个人。
15總係，佢等个刀劍會刺穿自家个心；
還有，佢等个弓箭會被人拗斷掉去。
16義人所有个雖然少，
贏過壞人財產盡多。
17因為壞人个權勢會破滅；
總係上主愛扶持義人。
18上主知完全人个壽年；
佢等个產業永遠長存。
19佢等在患難个日毋會失望，
飢荒个時節還係有好飽足。
20總係，作惡个人最後會滅亡。
上主个對敵會像野花謝掉；
佢等會像雲煙共樣消散掉。
21壞人借錢毋還；
總係義人大方施捨。
22上主賜福个人會承接土地；
佢所咒詛个一定會受剪除。
23上主若歡喜麼人所行个路，
就使佢个腳步穩當；
24萬一跌倒，也毋會跌到貼貼，
因為上主扶等佢个手。
25𠊎從細到這下，已經食到恁老，
吂識看過有義人被上主放掉，
毋識看到義人个子孫做乞食。
26佢一直救濟人，樂意借給人；
佢个子孫也全部得到福氣！
27你等愛離惡行善，
就做得永遠安居樂業。
28因為上主所愛个就係公義；
佢毋會放掉佢忠心个子民。
佢等會永遠得到佢个保佑；
總係，壞人个子孫會受剪除。
29一切个義人會承接土地，
子子孫孫永久住在這位。
30義人个嘴發出智慧个話；
佢个舌乸講論公義个事。
31佢个心中有上帝个教示；
佢个腳步一定毋會溜倒。
32壞人緊偷看義人，
愛尋機會殺害佢；
33總係上主毋會放掉義人，
毋會俾佢落在仇敵手中，
受審判也毋會致到定罪。
34愛仰望上主，遵行佢个道路！
佢會高升你，俾你承接土地；
你會看到作惡个人受剪除。
35𠊎識看過一個當惡个壞人，
像黎巴嫩个香柏樹 恁高大；
36後來𠊎經過个時，佢卻毋見掉 ；
𠊎尋來又尋去，總係尋佢毋到。
37注意完全人，看正直人；
愛和平个人子孫興旺；
38總係悖逆个人會全部消滅；
壞人个後代會受剪除！
39上主係義人个拯救者，
佢等患難時个避難所。
40上主幫助佢等，拯救佢等；
佢救佢等脫離邪惡个人，
因為佢等尋求佢个庇佑。
Who We AreWhat We EelieveWhat We Do
2025 by iamachristian.org,Inc All rights reserved.
