1 耶利哥人將城門關到𢫮𢫮，為到愛阻擋以色列人个侵入。無人做得對城門出入。
2上主對約書亞講：「𠊎已經將耶利哥城、連它个王㧯該兜勇士，全部交在你个手中了。
3你愛帶領軍隊，逐日𫟧城一輪，連續六日。
4你愛派七個祭司，逐儕拿等羊角做个號角，行在約櫃頭前。到第七日，你愛帶領軍隊𫟧城七輪，該七個祭司愛緊歕號角。
5然後佢等愛歕一長聲；你等一聽到這長聲，全部愛大聲喊，城牆就會橫掉。該時，軍隊就愛做一下攻入城肚。」
6 嫩个孻仔約書亞召集該兜祭司來，對佢等講：「你等愛扛等上主个約櫃，其中七個祭司愛拿號角行在約櫃頭前。」
7接等，佢命令軍隊講：「你等愛開始𫟧城，打頭陣个部隊愛帶頭，行在上主約櫃个頭前。」
8-9所以，約書亞一命令，打頭陣个部隊就帶頭行，接等係該七個歕號角个祭司，再來係該兜扛約櫃个祭司，最後背係後衛部隊。該七個祭司歸路緊歕號角；
10總係約書亞命令軍隊講：「你等毋好喊，毋好出聲，連一句話也做毋得講，愛等到𠊎下命令个日，該時正做得大聲喊。」
11恁樣，約書亞使上主个約櫃𫟧城一輪；然後大家轉營中過夜。
12-13第二日，約書亞打早䟘起來。該兜祭司㧯軍隊第二擺𫟧城。佢等照前一日个順序行：對打頭陣个部隊開路，然後係七個歕號角个祭司，接下去係該兜扛上主約櫃个祭司，最後背係後衛部隊。該七個祭司歸路緊歕號角。
14這日，佢等就𫟧城行一輪，然後轉營中。連續六日，佢等逐日就恁樣做。
15第七日，佢等天一光就䟘起來，用共樣个方式𫟧城七輪。單單這日，佢等𫟧城七擺。
16到第七輪，該兜祭司愛歕號角个時，約書亞命令部隊講：「愛大聲喊！因為上主已經將這城交給你等了！
17這城㧯城肚所有个東西愛毀滅，當做祭物獻給上主；只有妓女喇合㧯姖个屋下人，你等愛饒佢等个性命，因為姖識將𠊎等个探仔囥起來。
18你等愛細膩，做毋得拿該兜愛毀滅个東西；驚怕你等係有拿，就會給以色列全營帶來災禍、滅亡。
19所有用金銀銅鐵製造个東西全部愛聖化歸上主，放入上主个寶庫。」
20所以，該兜祭司開始歕號角；人民一聽到就大聲喊，城牆黏時橫下來。軍隊就做一下向前，佔領這座城。
21佢等用刀仔㓾掉城肚所有个人，無分男女老幼全部㓾掉。佢等也㓾掉牛、羊、㧯驢。
22 約書亞對該兩個探仔講：「你等到妓女喇合屋下，照你等向姖發誓个，將姖㧯姖个屋下人全部帶出來。」
23兩個探仔就去，將喇合帶出來，也帶出姖个爺𡟓、兄弟、㧯其他个屋下人，將佢等安頓在以色列營外安全个所在。
24然後人民放火燒城。佢等單單將金銀銅鐵製造个東西帶出來，放在上主个寶庫，其他个東西全部燒掉。
25約書亞保全妓女喇合㧯姖全家人个性命，因為姖識將約書亞派去耶利哥个兩個探仔囥起來。 (喇合㧯姖个屋下人就安居在以色列，直到今晡日。)
26這時，約書亞發出嚴厲个警告，講：「願上主咒詛該想愛重建耶利哥城个人：
愛打這城地基个人，會死長子；
愛起這城門个人，會死滿子。」
27上主㧯約書亞共下；約書亞个名聲傳遍該地方。
Who We AreWhat We EelieveWhat We Do
2025 by iamachristian.org,Inc All rights reserved.
