傳道書 8 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1麼人像智慧人呢？

麼人知事情个意義？

人个智慧使佢个面會發光，

也使佢个氣質改變。

服從君王

2愛遵守王个命令；這係你向上帝許願過个。

3毋好隨便離開王个面前，也毋好㧯佢作對，因為王做得隨意做事。

4王个話當有權柄，麼人敢問佢講「你做麼介？」

5遵從佢个命令，正有安全。聰明人知做事个時機㧯方法。

6雖然人个苦難重重壓在佢个身項，各樣事全部有適當个時機㧯方法。

7無人知將來會發生麼介事，也無人有辦法㧯佢講。

8無人做得掌管生命个氣，也無人做得決定自家个死期；因為生死係人無法閃開个戰爭；壞人用邪惡乜無法救自家。

壞人㧯正直人

9日頭下發生个一切事，𠊎全部有去看，也用心研究。有兜人有權有勢，另外有兜人被佢等管到盡艱苦。

10𠊎看到壞人死後還係得到埋葬。佢等生前出入聖所；死後𠊎聽到人在佢等作惡个所在誐𧩣佢等 。這也係空虛。

11做麼介世間人恁大膽犯罪？因為罪無黏時受到刑罰。

12罪人雖然犯罪一百擺，還係食到盡長命，𠊎確實相信：「敬畏上帝个人會凡事順利；

13總係作惡个人無福氣。佢等个生命像影仔；佢等會夭折，因為佢等毋敬畏上帝。」

14世間還有一件空虛个事：有時，義人受到壞人應該受个責罰；壞人反轉得到義人應得个報賞。𠊎講，這也係空虛。

15所以，𠊎認為人應該享樂；因為在日頭下佢所有个歡樂就係啉食㧯享受。這係人在上帝所賜短暫个生命中，勞碌所得到个一些仔享受。

16𠊎專心追求智慧，想愛研究世間所發生个事，該時𠊎知，人就算日夜思想，

17也無辦法明白上帝个作為。佢無論樣般研究，想愛知在日頭下所發生个事，也尋毋到答案。智慧人恅到自家盡知，其實並毋知。