帖撒羅尼迦後書 2 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

該不法者

1兄弟姊妹啊，關係𠊎等个主耶穌基督个再來，並佢愛聚集𠊎等同佢相會个事，𠊎等求你等，

2毋好恁遽就被「主再來个日仔已經到了」這種講法來搖動，來操煩。可能有人講，這講法係𠊎等所傳、所講、抑係寫在信仔底背个。

3無論麼人用麼介方法，你等毋好俾佢等騙到。因為，該日仔來到以前，定著會有大悖逆；該註定愛滅亡个不法者會出現。

4該不法者會反對一切被人稱做神明抑係敬拜个對象，高升自家到一切个頂高；佢甚至會去坐在上帝个聖殿肚，自稱係上帝。

5你等毋記得係麼？𠊎同你等共下个時，已經將這個事㧯你等講過了。

6阻擋這件事，毋俾它這下就發生个係麼介，你等知。時機一到，該不法者就會出現。

7該神秘不法个力量已經開始進行；總係，愛等到阻擋這件事个手徙開以後，這件事正會發生。

8該時，不法者會出現；總係主耶穌再來个時愛用口中个氣來除滅佢，用自家降臨个榮光將佢消滅。

9該不法者會靠撒但个權勢來到，行各種个奇事㧯神蹟，顯出假个兆頭，

10佢也會用各種个詭計來對待該兜滅亡个人；佢等滅亡，因為佢等毋接受，也毋愛惜該會使佢等得救个真理。

11因為恁樣，上帝就使佢等迷迷痴痴，俾佢等信從花撩。

12結尾，一切毋信真理、歡喜不義个人，會受定罪。

受揀選，得救恩

13主所惜个兄弟姊妹啊，𠊎等應該常常為你等感謝上帝；因為上帝揀選你等，通過聖靈神聖个工作㧯你等對真理个信仰，使你等先得救 。

14通過𠊎等所傳給你等个福音，上帝呼召你等來分享𠊎等个主耶穌基督个榮光。

15所以，兄弟姊妹啊，你等愛企在！對𠊎等所教个真理，無論係用講个抑係用信仔寫个，你等一定愛好好遵守。

16上帝惜𠊎等，施恩將永存个安慰㧯美好个盼望賜給𠊎等。願這個阿爸上帝㧯𠊎等个主耶穌基督，

17激勵你等，使你等有勇氣來傳講並實行一切美好个事。