民數記 34 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

迦南个地界

1上主吩咐摩西

2將以下个指示㧯以色列人講：「你等進入𠊎愛賜給你等个迦南地以後，你等个地界係恁樣：

3南片對尋个曠野跈等以東邊界延長下去，就係對死海南端个東片開始，

4轉向南方个亞克拉濱隘口，經過尋，一直向南到加低斯‧巴尼亞，然後向西北方到哈薩‧亞達，再到押捫，

5對該位轉向埃及邊界个山壢，到地中海為止。

6「西片个地界係地中海。

7「北片个地界對地中海到何珥山，

8再到哈馬隘口，又直到西達達㧯

9西斐崙，到哈薩‧以難為止。

10「東片个地界對哈薩‧以難到示番，

11然後向南到亞延東片个利比拉，再到加利利湖東岸个山岡，

12然後跈等約旦河南下到死海。

「這就係你等土地四圍个邊界。」

13所以，摩西吩咐以色列人講：「這就係你等愛抽籤來分个土地，係上主分配給九隻半支族做產業个土地。

14呂便、迦得兩支族㧯瑪拿西半支族已經得到佢等个產業，照佢等个家族分配，

15就係在約旦河東片耶利哥對面个土地。」

負責分地个領袖

16上主對摩西講：

17「祭司以利亞撒㧯嫩个孻仔約書亞愛為人民分配土地做產業。

18逐支族愛派一個領袖協助佢等。」

19-28以下係上主所選个人：

猶大支族：耶孚尼个孻仔迦勒；

西緬支族：亞米忽个孻仔示母利；

便雅憫支族：基斯倫个孻仔以利達；

但支族：約利个孻仔布基；

約瑟个子孫瑪拿西支族：以弗个孻仔漢聶；

以法蓮支族：拾弗但个孻仔基母利；

西布倫支族：帕納个孻仔以利撒番；

以薩迦支族：阿散个孻仔帕鐵；

亞設支族：示羅米个孻仔亞希忽；

拿弗他利支族：亞米忽个孻仔比大黑。

29以上係上主指定為以色列人分配迦南土地个人。