1上主㧯𠊎講話；
2佢講：「人子啊，你住在悖逆个人當中。佢等有目珠，總係看毋到，有耳公，總係聽毋到，因為佢等係悖逆个人。
3「所以，人子啊，你愛準備逃難愛用个包袱，在斷烏以前出發。你愛當佢等个面前離開，到另外一個所在去。希望該兜悖逆个人會注意到你个行動 。
4你愛在日時頭準備好逃難愛用个包袱，好俾佢等看到你所做个。到臨暗仔，你愛在佢等个目珠前離開，就像愛逃難恁樣。
5佢等還看等个時，你愛將若屋下个壁挖一隻孔仔，對該隻孔仔將包袱帶出去。
6你愛在佢等面前將包袱揹在肩頭，揞等目珠行出去。你所表演个就係𠊎愛給以色列人个警告。」
7𠊎照上主所吩咐个去做。該日，𠊎準備好逃難愛用个包袱，一到臨暗仔，𠊎就用手將壁挖一隻孔仔，然後在佢等个目珠前揹等包袱離開。
8第二朝晨，上主㧯𠊎講話；
9佢講：「人子啊，該兜悖逆个以色列人敢毋係問你，愛知你做麼介？
10你愛將𠊎 — 至高个上主愛對佢等講个話㧯佢等講。這係有關在耶路撒冷統治个領袖㧯佢周圍以色列人民个信息。
11愛㧯佢等講，你所做个係一種兆頭，表示愛發生在佢等身項个事。佢等愛被人捉去做難民。
12佢等中間个領袖愛在斷烏个時揹起包袱，對佢等為佢挖開个壁孔仔逃走。佢愛揞等目珠，看毋到愛去个所在。
13𠊎愛打開𠊎个羅網捉佢，將佢帶去巴比倫城。佢雖然死在該位，也毋會看到該城。
14𠊎愛將佢旁邊所有个人，包含顧問㧯軍隊四散到列國去。𠊎愛在逐所在逐佢等，㓾佢等。
15「𠊎將佢等逐走、四散在外國以後，佢等就會知𠊎係上主。
16總係，𠊎愛在佢等當中留下少數个人，毋使受到戰亂、飢荒、發瘟个災害。恁樣，該兜賸到个人愛在被人捉去个逐國，講起自家以前所做个係樣般積惡，又愛承認𠊎係上主。」
先知大著驚个兆頭17上主㧯𠊎講話；
18佢講：「人子啊，你愛緊食緊顫；緊啉緊驚、無葛無煞。
19你愛對全國个人民講，這係至高个上主愛㧯留在以色列本土所賸个耶路撒冷人講个話。佢等愛緊食緊顫，緊啉緊驚、無葛無煞。佢等个土地愛荒廢，因為人民全部無王無法。
20人口多个城市會荒掉，村莊變做曠野。恁樣，佢等就會知𠊎係上主。」
平凡个俗語㧯無平凡个信息21上主㧯𠊎講話；
22佢講：「人子啊，以色列人做麼介流傳講『一日又過一日，異象全無實現』這句俗語呢？
23你愛㧯佢等講，𠊎 — 至高个上主恁樣講：𠊎愛結束這句俗語；以色列當中毋會再流傳這句話。你反轉愛㧯佢等講：『日仔到了，異象愛實現了！』
24「在以色列人當中毋會再有假異象㧯迷惑人个預言。
25𠊎 — 上主自家愛對佢等講話；𠊎講个話一定愛實現，絕對毋會停跎。悖逆个人啊，𠊎對你等發出个警告，一定愛在你等還生个時執行。𠊎 — 至高个上主恁樣宣佈了。」
26上主又㧯𠊎講話；
27佢講：「人子啊，以色列人恅到你所看到个異象、所講个預言，全部係指等當久以後个事。
28所以，你愛㧯佢等講，𠊎 — 至高个上主恁樣講：𠊎个話連一句毋會再停跎；𠊎講个話一定愛實現。𠊎 — 至高个上主恁樣宣佈了。」
Who We AreWhat We EelieveWhat We Do
2025 by iamachristian.org,Inc All rights reserved.
