歷代志下 3 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

1 所羅門个阿爸大衛已經為聖殿準備一個所在，就係在耶路撒冷个摩利亞山頂 — 上主識向大衛顯現个所在，就係耶布斯人亞勞拿个打麥場。

2所羅門做王个第四年二月初二開工起聖殿。

3所羅門起上帝聖殿个地基，有二十七公尺長，九公尺闊。

4入門口个門廊㧯聖殿平闊，闊九公尺，高九公尺。門廊內部全部貼純金。

5大殿个壁釘一排香柏樹枋，再貼純金，頂高雕刻棕樹㧯鍊仔个圖案。

6王用盡靚个寶石㧯對巴瓦音進口个金仔裝璜聖殿。

7佢用金仔貼聖殿个壁、樑、門㧯門檻。師傅在壁頂雕刻基路伯。

8至聖所个內殿有九公尺長，九公尺闊，㧯聖殿平闊。至聖所壁頂所貼个金仔有二十公噸。

9金釘仔用掉五百七十公克。樓房个壁也有貼金仔。

10王又命令師傅做兩個基路伯，外背包等金仔，放在至聖所底背。

11-13這兩個基路伯平平企等，面對入口；逐個基路伯有兩隻翼胛，逐隻翼胛有兩公尺兩公寸長，兩對翼胛打開，在殿个中間互相接到，兩片揬到壁，大約九公尺闊。

14至聖所个布幕係用麻紗㧯其他材料做个，染做藍色、紫色、紅色，有基路伯个圖案刺在頂高。

兩支銅柱(列王紀上 7:15-22)

15王喊人做兩支銅柱，逐支高十五公尺半，頓在聖殿頭前。逐支有一隻柱頭，高兩公尺兩公寸。

16銅柱頭安等有辮織个鍊仔圖形，鍊仔頂有一百隻銅石榴。

17這兩支銅柱頓在聖殿入口个兩片，南片該支喊做雅斤

，北片該支喊做波阿斯

。