啟示錄 15 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

天使㧯背尾个災難

1𠊎又看到在天頂有另外一個神秘个奇事，又大又奇。有七個天使掌管最後七種災難，因為上帝个大怒氣愛在這兜災難中發盡。

2𠊎又看到一個像玻璃个海，摻等火。𠊎也看到一兜人；佢等已經贏過該隻惡獸、牠个像，㧯該代表牠个名个數目。佢等企在玻璃海个滣頭，拿等上帝給佢等个弦琴，

3唱等上帝个僕人摩西个詩歌㧯羔羊个詩歌，講：

主 — 全能个上帝啊，

你个所做偉大又奇妙！

萬國 个王啊，

你个道路公義又真實！

4主啊，麼人敢毋敬畏你呢？

麼人敢毋榮光你个名呢？

因為唯有你係神聖个！

萬國全部愛來，

在你面前敬拜，

因為你公義个所做已經彰顯出來了。

5這兜事情以後，𠊎看到天頂个聖殿打開來，底背有上帝臨在个聖帳篷。

6該掌管七種災難个七個天使對聖殿出來，著等麻紗个衫，白淨皓光，胸前繫等金帶。

7四個生物其中个一個將七隻金碗交給該七個天使；金碗底背裝滿永生上帝个怒氣。

8因為上帝个榮耀㧯權能，聖殿底背滿滿係煙；該七個天使降七種災難完成以前，無人能入去聖殿。