1以下係上主在摩押命令摩西㧯以色列人立約个內容。這係佢頭擺在何烈山㧯佢等立約以外个。
2 摩西召集所有个以色列人，對佢等講：「你等親目看到上主對埃及王、佢个官員㧯全國所做个一切。
3你等親目看到上主降下該兜得人驚个災禍㧯佢所行偉大个神蹟奇事。
4總係到今晡日，上主還無俾你等確實明白你等所經驗个有麼介意義。
5四十年久，上主𢱋你等經過曠野，你等个衫褲㧯鞋全部無著爛。
6你等無食餅，無啉釅酒抑係淡酒，總係上主供給你等所需要个一切，為到愛使你等認識佢係上主 — 你等个上帝。
7你等到這地方个時，希實本王西宏㧯巴珊王噩出來攻打𠊎等；𠊎等就打贏佢等，
8佔領佢等个土地，將土地分給呂便、迦得兩支族㧯瑪拿西个半支族。
9你等愛確實遵行這約所有个規定，使你等所做个全部順利。
10-11「今晡日，你等各支族个族長、長老、官員，㧯以色列所有个男女老幼，連住在你等當中、代你等剖柴㧡水个外族人，全部企在上主 — 你等个上帝面前；
12你等愛遵守佢今晡日㧯你等所立个約，向你等所發个誓。
13恁樣，上主會照自家向你等所應許个話，又向你等个祖先亞伯拉罕、以撒、雅各所發个誓，就在今晡日立你等做佢个子民，佢做你等个上帝。
14上主毋單淨㧯你等立這約，發這誓，
15上主 — 𠊎等个上帝也㧯𠊎等今晡日企在佢面前个人並每一個還吂出世个子子孫孫立約。
16「你等記得在埃及過樣般个生活，經過其他外族个國家又係樣般个情況。
17你等看到佢等用樹頭、石頭、金銀製造邪惡个偶像。
18你等今晡日企在這位个人，無論男女、家族㧯支族，做毋得有一儕心肝離開上主 — 𠊎等个上帝，去拜別國个神明；若係有，就會像樹根生出又苦又毒个樹仔。
19你等今晡日企在這位、聽到這兜咒詛个人，無一儕敢講，『就算𠊎硬頸毋受約束，一切還會順利』。若係有恁樣个人，佢會連累你等，使好人壞人共下滅亡。
20上主絕對毋會赦免這種人；佢會對佢大發譴。法律書上所寫个咒詛全部會臨到佢个身上，一直到上帝完全除掉佢个名。
21上主定著愛拿佢做例仔來警告以色列各支族，照這法律書㧯立約所記載个各種咒詛，使災難臨到佢身上。
22「你等个子孫㧯遠方个外族人會看到上主降災禍㧯病痛在你等个土地上。
23田園會荒廢，全地遍滿硫磺㧯鹽，無法度耕種，連雜草也毋會生。你等个土地會像上主在大發譴之下毀壞个所多瑪、蛾摩拉、押瑪、洗扁該兜城市。
24該時，天下个人會問：『上主做麼介恁樣對待這地呢？佢做麼介恁樣大發譴呢？』
25有人會應講：『因為上主个子民違悖上主 — 佢等祖先个上帝㧯佢等所立个約；這約係上主帶領佢等離開埃及後㧯佢等所立个。
26佢等離開上主去服事別个神明，去拜該兜從來毋識拜過、上主禁止佢等拜个神明。
27所以，上主對佢等發譴，使這書上所記載个咒詛降在佢等个土地上。
28上主在大發火中、大發譴，對佢等个土地上將佢等連根挷出來，㧒到外國去。今晡日佢等還在該位。』
29「奧秘个事係屬上主 — 𠊎等个上帝；總係顯明个事永遠屬𠊎等㧯𠊎等个子孫，為到愛𠊎等遵行這法律一切个話。」
Who We AreWhat We EelieveWhat We Do
2025 by iamachristian.org,Inc All rights reserved.
