以西結書 30 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

上主愛責罰埃及

1上主又㧯𠊎講話；

2佢講：「人子啊，你愛講預言，宣佈𠊎 — 至高个上主愛講个話。你愛大聲喊：

慘了，得人畏个日仔到了！

3上主愛行動个日仔到了；

該係烏暗、列國受責罰个日仔。

4 埃及會堵到戰亂；

古實會有苦難。

埃及全地有屍體；

全國被人搶，變做平地。

5「對古實、弗、呂底亞、阿拉伯、故普

，甚至對𠊎子民當中請來个兵仔全部會戰死。」

6上主恁樣講：「對北部个密奪到南部个色弗尼

，所有保衛埃及个人全部會戰死；埃及最強个軍隊全部會被人消滅。𠊎 — 至高个上主恁樣宣佈了。

7埃及會變做世界上最荒涼个土地；埃及个城市會比所有荒涼个城還較淒涼。

8𠊎放火燒埃及，將保護城个軍隊㓾淨淨以後，佢等就會知𠊎係上主。

9「埃及毀滅該日，𠊎愛派使者坐船去擾亂無愁無慮个古實人，使佢等驚到會死。該日已經到了！」

10至高个上主恁樣講：「𠊎愛用巴比倫王尼布甲尼撒个手搶走埃及个財富。

11佢愛帶領當惡个軍隊來，攻打埃及。佢等愛用刀劍攻擊，使埃及滿遍有屍體。

12𠊎愛使尼羅河燥掉，將埃及交在壞人手中。𠊎愛用外國人來破壞全國。𠊎 — 上主恁樣宣佈了。」

13至高个上主恁樣講：「𠊎愛破壞在孟斐斯

个偶像㧯假神。埃及會無人來統治；𠊎愛使埃及人驚到會死。

14𠊎愛使埃及南部荒涼；𠊎愛放火燒北部个瑣安城，責罰首都底比斯。

15𠊎愛向埃及最堅固个保護城 — 訓城，拚出𠊎个大發譴，消滅底比斯个財富。

16𠊎愛放火燒埃及；訓城會堵到大災難。底比斯个城牆會被人打橫掉；孟斐斯會長透被敵人攻打。

17希利坡里城㧯比伯實城个青年全部會戰死；其他个人全部會被人捉走。

18𠊎收掉埃及个力量、消滅姖所誇口最好个軍隊時，烏暗會將答比匿揜起來。烏雲愛遮等這城，周圍逐城市个人民全部會被人捉走去。

19𠊎恁樣責罰埃及，佢等就會知𠊎係上主。」

埃及王个失敗

20𠊎等被人捉去个第十一年正月初七，上主㧯𠊎講話。

21佢講：「人子啊，𠊎打斷埃及王个手骨，無人代佢包傷膏藥，醫好佢，使佢會再擎劍。

22所以，𠊎 — 至高个上主恁樣講：𠊎愛㧯埃及王做對敵；𠊎愛打斷佢个雙手 — 無論好好个抑係斷掉个全部打斷，使佢手中个劍跌下去。

23𠊎愛將埃及人分散到全世界。

24然後，𠊎愛使巴比倫王个手骨強壯起來，將𠊎个劍交在佢手中。總係，𠊎愛打斷埃及王个手骨，佢會在敵人面前噌到會死。

25𠊎一定愛使埃及王衰弱，使巴比倫王強壯。𠊎將𠊎个劍交給巴比倫王以後，佢會將劍指向埃及，逐儕就會知𠊎係上主。

26𠊎愛將埃及人分散到全世界；該時，佢等就會知𠊎係上主。」