1上主恁樣吩咐𠊎：「去買一條麻紗腰帶 繫起來；總係毋好浸在水中。」
2所以𠊎照上主个吩咐買一條腰帶繫起來。
3上主第二擺㧯𠊎講：
4「你到幼發拉底河 去，將你所繫个腰帶囥在石縫肚。」
5𠊎就照上主个命令到幼發拉底河去，將腰帶囥在該位。
6過了一站時間，上主吩咐𠊎：「你到幼發拉底河去拿該條𠊎吩咐你囥起來个腰帶。」
7𠊎就轉到該位，將囥等个腰帶挖出來；腰帶已經糜掉，用毋得了。
8接等，上主又㧯𠊎講話。佢講：
9「𠊎愛照恁樣破壞猶大㧯耶路撒冷人民个大驕傲。
10這班人民當壞，毋肯聽從𠊎个命令。佢等還係硬頸邪惡，還去敬拜、服事別个神明。所以，佢等會像這條腰帶恁樣變無路用。
11就像腰帶黏等人个身體，𠊎本來愛所有以色列人㧯猶大人黏等𠊎。𠊎愛佢等做𠊎个子民，好俾𠊎个聖名受稱讚，得榮耀；總係佢等毋肯聽。」
酒缸个比喻12上主 — 以色列个上帝㧯𠊎恁樣講：「耶利米啊，你愛對以色列人講：逐隻酒缸全部愛裝滿酒。若係佢等應講：『𠊎等樣毋知逐隻酒缸愛裝滿酒？』
13然後，你正㧯佢等講：𠊎 — 上主愛用酒灌醉這地方所有个人民；大衛王朝个君王、祭司、先知，㧯耶路撒冷个人民全部會像食酒醉。
14𠊎愛打碎佢等，使佢等就算係爺𡟓㧯子女也會逆到，像酒缸相磕到碎掉。𠊎絕對毋憐憫佢等，毋惜佢等，毋同情佢等；𠊎一定愛消滅佢等。」
耶利米警告驕傲个行為15 以色列人啊，上主已經恁樣宣佈了。
你等愛謙卑，愛注意聽佢个話。
16烏暗還吂到以前，
你等還吂在暗暗个深山跌倒以前，
愛榮光上主 — 你等个上帝。
上主還吂將你等所盼望个
光明變做烏暗以前，
你等愛榮光上主 — 你等个上帝。
17若係你等毋聽，
𠊎愛因為你等个驕傲偷噭；
𠊎會噭到目汁濫泔；
因為上主个羊群會被人捉走了。
18上主㧯𠊎講：「去喊王㧯太后 謙卑對寶座頂下來！因為佢等頭那頂盡靚个冕旒會跌下來了。
19猶大南部逐隻城市會被敵人圍等；無人能代佢等解圍。猶大个人民全部會被人捉走。」
20 耶路撒冷啊，你看！敵人對北方來囉！交託你看顧个羊群、你所誇口个羊仔這下在㖠位呢？
21你所結交、一直看做好朋友个，反轉來征服你、愛統治你；你還有麼介話好講呢？你會像產婦陣痛恁樣痛苦。
22若係你想愛知，你做麼介會堵到這個災難，做麼介裙仔被人掀起來、被人侮辱，這係因為你犯當多罪所惹來个。
23古實人敢能改變皮膚个色？花豹敢能除掉牠个斑點？這兜事若係有可能，你這兜做慣壞事个人正有可能做好事。
24所以，上主愛打散你等，就像曠野个風將冇仔吹走。
25佢講，這係你个報應。佢決定恁樣對付你，因為你毋記得佢，反轉去信假神。
26上主愛親自掀你个裙仔，來幪你个面，使你見笑。
27因為佢有看到你做佢所惱个事；看到你在山頂、田項拜別个神明、像婦人家犯姦淫、發淫聲、行毋知見笑个淫亂。
耶路撒冷啊，你慘了！你無淨浰愛到幾時呢？
Who We AreWhat We EelieveWhat We Do
2025 by iamachristian.org,Inc All rights reserved.
