1 約伯應講：
2願有人將𠊎个憂愁秤看仔，
有人將𠊎个災難放在天平；
3它兜比海滣个沙還較重；
所以，毋好怪𠊎講話粗俗。
4全能个上帝用箭射到𠊎；
箭頭个毒遰到𠊎个身心靈。
上帝用各種得人驚个災難打擊𠊎。
5野驢有青草就滿足；
牛有草好食就恬恬。
6食物無鹹無味樣食得？
卵白敢有麼介味緒呢？
7這種食物𠊎無愛食，
一下落嘴就想愛嘔。
8願上帝賜給𠊎所祈求个，
賞賜𠊎所盼望个。
9願上帝將𠊎磧糜，
出手將𠊎剪除！
10恁樣，𠊎還係會得到安慰；
苦難重到會死，𠊎還會歡喜，
因為𠊎從來毋識違背神聖上帝个命令。
11𠊎㖠有元氣緊等等下去呢？
𠊎毋知結局，愛樣般忍耐呢？
12敢講𠊎係石頭做个？
敢講𠊎个身體係銅打个？
13𠊎實在無辦法好救自家；
𠊎毋知愛去㖠位求幫助。
14該兜無用慈愛對待朋友个，
就係豁掉對全能者个敬畏 。
15𠊎个兄弟啊，你等像溪水靠毋得，
一下無落雨，水就燥掉。
16寒天落雪个時，
溪水就結冰。
17在熱天需要水个時，
它又燥掉。
18歸隊生理人尋水源卻迷路，
佢等行毋著路就死在曠野。
19歸隊提瑪个生理人去尋水；
示巴个旅客緊等也緊希望。
20佢等个盼望變做痛苦；
佢等尋毋到水就失望。
21對𠊎來講，你等就像這溪水；
看到𠊎个情況，就著驚倒退。
22𠊎敢識向你等求麼介禮物，
抑係愛你等為𠊎去收買人？
23抑係要求救𠊎離開仇敵个手，
抑係贖𠊎離開該兜強暴个手？
24好啊，請你教𠊎，𠊎會恬恬聽；
使𠊎了解自家㖠位毋著。
25講話公當就會使人信服；
總係你等到底責備麼介？
26𠊎絕望个話你等看做像風；
做麼介還想愛責備改正𠊎？
27你等抽籤，愛得到孤兒來做奴才，
想愛賺錢，你等還敢出賣好朋友。
28請你等面對面來看𠊎，
𠊎絕對毋會講花撩。
29你等愛回心轉意，毋好恁無公平；
愛再想看仔，因為𠊎正直無虛假。
30𠊎个舌乸敢識講花撩，
𠊎敢毋會分別是非嗎？
Who We AreWhat We EelieveWhat We Do
2025 by iamachristian.org,Inc All rights reserved.
