1該日，人民愛在猶大地唱這首歌：
𠊎等个城牆樣般堅固！
上帝親自保護這個城！
2城門打開來！
俾正義个國家入來！
俾忠信个人民落來！
3上主啊，你將完全个平安
賜給心意堅強个人，
賜給信靠你个人。
4愛永遠信靠上主，
因為上主係永久个磐石。
5佢使驕傲个人謙卑；
佢破壞堅固个城市，拆掉城牆，
拆到平平，成做泥粉。
6被人欺負个會企在磚截堆頂高；
窮苦个人會踐踏橫下來个城牆。
7公義个上主啊，
你使公平个人行平路；
你使正直个人行直路。
8上主啊，𠊎等等候你，順從你个旨意；
你个名㧯名望係𠊎等心靈个願望。
9在暗晡時𠊎欣慕你，
𠊎全心全意尋求你。
在你審判世界个時節，
地上个萬民就學習正義。
10雖然你用仁慈對待壞人，
佢等還係毋肯學做善事；
在公義个地佢等行事不義，
佢等全無注意到你个威嚴。
11上主啊，你个仇敵毋知你愛責罰佢等。
俾佢等看到你恁熱心惜你个子民來感覺見笑；
俾佢等受到你早就為你敵人準備好个責罰。
12上主啊，求你使𠊎等興旺；
𠊎等个成就全部係你賞賜个。
13上主 — 𠊎等个上帝啊，
𠊎等識被別个主管制；
總係你正係𠊎等个主。
14佢等已經死掉，變做陰魂了，無可能返生；
佢等被你責罰，完全消滅，毋會有人紀念。
15上主啊，你使𠊎等个國家興旺，
使𠊎等个國民緊多、土地緊闊，
因為恁樣，你个名就得到榮光。
16上主啊，你識責罰你个子民；
在苦難中佢等全心求喊你 。
17上主啊，你使𠊎等大聲盡喊，盡嘶，
像生產个婦人家在陣痛中緊噌。
18𠊎等識像生產恁樣盡喊、盡嘶，
所𫱔个不過係風定定。
𠊎等毋識為國家打贏戰爭；
𠊎等毋識使世間人失落跌倒 。
19總係𠊎等死掉个同胞會復活！
佢等个身體會再得到生命！
睡在墳墓中个人啊，愛返生大聲歡唱！
就像地上朝晨頭个露水帶來生命，
上主愛俾死掉个人再返生過來。
審判㧯復興20𠊎个同胞，入你等个屋肚去！門關好，暫時囥起來，直到上帝个怒氣消掉。
21上主愛對佢所住个天頂降臨，責罰世間人个罪。人間个兇殺全部會顯露出來；地面上毋會再囥等被人㓾死个屍體。
Who We AreWhat We EelieveWhat We Do
2025 by iamachristian.org,Inc All rights reserved.
