以西結書 4 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

表演耶路撒冷被人包圍

1上主講：「人子啊，拿一垤磚仔放在你面前，在頂高畫一座城代表耶路撒冷，

2又在城个周圍造高臺，起土堆，安營，搭攻城个槌仔，代表城被人包圍。

3然後，你愛拿一垤鐵盤立在你㧯城之間做鐵牆。你愛面對這座城，表示城被人包圍，圍城个就係你。這就係𠊎給以色列人个兆頭。

4-5「接等，你愛向左片打側睡；𠊎愛將以色列个罪磧在你身上。你愛在該位睡三百九十日，為佢等犯个罪受苦。𠊎喊你睡个日期係𠊎判佢等應該受責罰个刑期，一日準一年。

6這刑期滿以後，你愛向右片打側睡四十日，為猶大个罪受苦，一日準一年。

7「你愛面向耶路撒冷，對等受包圍个城出拳，講預言攻擊這城。

8𠊎愛將你捆起來，使你無辦法翻身，一直到圍城个日期滿。

9「接等，你愛拿兜小麥、大麥、豆仔、紅豆、細米、粗麥裝在器皿中，用來做餅。這就係你向左片打側睡該三百九十日个食物，

10逐日做得食兩百三十公克定定，愛照時食。

11你逐日做得食兩杯水定定，愛照時食。

12你愛在民眾面前，燒人屎來焙餅食。」

13上主講：「這表示𠊎將以色列人逐到外國去个時，佢等愛食法律所禁止無淨浰个東西。」

14總係，𠊎應講：「唉！至高个上主啊，𠊎毋識打垃圾自家，從細就無食自然死掉个抑係被野獸咬死个動物。𠊎無食過無淨浰个食物。」

15所以上帝講：「好啊，你做得將人屎換做牛屎拿來燒，在頂高焙你个餅。」

16佢又講：「人子啊，𠊎愛使耶路撒冷斷糧、斷水。逐擺人民照配給个份量食餅、食水个時，佢等會愁到無葛無煞。

17佢等會食到無餅無水，彼此著驚，因為自家个罪衰弱到死。」