利未記 24 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

點燈个條例(出埃及記 27:20-21)

1上主吩咐摩西：

2「愛命令以色列人將盡純个橄欖油帶來，做聖帳篷底背燈臺个油料，好俾燈臺个燈常常𤏸等。

3逐暗晡，亞倫愛在放約櫃个至聖所頭前、該帳幔外點燈火，使這燈對臨暗仔到天光在上主面前𤏸等。這條例係佢个子孫愛世世代代遵守个。

4亞倫愛負責該純金燈臺頂高个燈火，使它在上主面前常常𤏸等。

獻給上主个供餅

5「你愛用二十四公斤幼麵粉焙十二垤餅，

6然後將餅擺在上主面前純金个桌頂；餅愛擺做兩行，一行六垤。

7你愛在逐行餅頂高委兜純乳香，代表將餅當做獻給上主个火祭。

8逐個安息日，亞倫一定愛將餅擺在上主面前，永遠做毋得停。這係以色列人永久愛遵守个約。

9這餅愛歸給亞倫㧯佢个後代。佢等愛在聖个所在食這餅；因為這係獻給上主个火祭中至聖个部份，係屬祭司个。」

公當个審判

10-11有一個人，厥爸係埃及人，阿姆係以色列中但支族人底伯利个妹仔、名安到示羅密。有一日，這個人在營肚㧯一個以色列人冤家。在爭吵當中，佢咒詛上主个聖名，佢等就帶佢到摩西該位，

12將佢關起來，等上主指示愛樣般刑罰佢。

13上主㧯摩西講：

14「將該個人帶到營外。所有聽到佢咒詛个人，全部愛將手放在佢个頭那頂，證明佢有罪，然後全會眾愛用石頭㧹死佢。

15接等，你愛㧯以色列人講：所有咒詛上帝个人愛㧡自家个罪。

16所有褻瀆上主名个人一定愛處死刑；全會眾愛用石頭將佢㧹死。無論係以色列人抑係暫住个旅客，若係佢咒詛上主个名，一定愛處死刑。

17「㓾人个，定著愛處死刑；

18㓾別人頭牲个，一定愛賠頭牲，係用命賠命。

19「人若傷害別人，愛照佢樣般對待別人來對待佢：

20骨頭賠骨頭；目珠賠目珠；牙齒賠牙齒。佢樣般傷害別人，也愛受共樣个傷害。

21㓾別人頭牲个，一定愛賠頭牲；總係㓾死人个，一定愛處死刑。

22無論係以色列人抑係暫住个旅客，全部共樣愛守這法律。𠊎係上主 — 你等个上帝。」

23 摩西對以色列人講煞這兜話，佢等就帶該人到營外，用石頭將佢㧹死。恁樣，以色列人就照上主給摩西个命令去做。