1這係上主啟示个話：
佢已經宣佈愛責罰哈得拉地㧯大馬士革城。毋單淨以色列各支族屬上主，敘利亞个京城也屬上主 。
2還有哈得拉邊界个哈馬，並泰爾、西頓兩城个人，不管佢等有幾大个才能，也係屬上主。
3泰爾為自家起城堡，積存金銀，多到像街路个泥沙。
4總係，主愛將它所有个全部拿走，毀掉它海上个權利 ；這城會被火燒掉。
5該時，亞實基倫看到就著驚；迦薩看到就痛苦至極；以革倫也共樣失望到見笑。迦薩會失掉君王；亞實基倫會無人住。
6外族人會住在亞實突。上主講：「𠊎愛使驕傲个非利士人變卑微。
7佢等毋會再食帶血个肉，牙齒縫毋會有得人惱个食物。所賸个人會成做𠊎个子民，像猶大个一族。以革倫人會成做𠊎个子民，㧯耶布斯人 共樣。
8𠊎愛在𠊎个家園四圍安營，毋俾軍隊侵入來踐踏。𠊎毋准有人再欺負𠊎个子民，因為這下𠊎認真看等𠊎个家。」
將來个君王9住在錫安个人啊，愛歡喜快樂！
耶路撒冷个人民啊，愛歡喜吶天！
看啊，你个君王來了！
佢係公義个，佢係得勝个，
總係盡謙卑騎等驢仔來，
騎等一條細驢仔。
10上主講：
𠊎愛拿走以法蓮个戰車，
除掉耶路撒冷个戰馬；
戰場个弓也愛拗掉。
你等个王愛向各國講和平；
佢愛統治這海到該海，
對幼發拉底河到地極。
上帝子民个復興11上主講：
因為𠊎識用血㧯你立約，
𠊎愛將你等被人捉去關个，
對燥水窟底背放出來。
12被人關還有指望个人啊，
愛轉來！轉到安全个城堡！
𠊎今晡日㧯你等講，
𠊎愛加倍賜福來補償你等。
13𠊎愛用猶大做𠊎个弓，
用以法蓮做𠊎个箭；
錫安啊，𠊎愛使你个人民䟘起來，
像勇士个刀，去攻打希臘人。
14上主愛在佢子民个頂高顯現；
佢射个箭像𥍉爧。
至高个上主愛歕羊角；
佢愛坐等南片个暴風雨來。
15上主 — 萬軍个元帥愛保護佢个子民；
佢等愛消滅對敵，
踏等敵人㧒過來个石頭 ，
大聲噦嘶，像食酒醉个人。
佢等愛像獻祭時裝血个碗公共樣、滿身係敵人个血；
血流等下，像頭牲个血在祭壇个四隻角流等下 。
16在該日，上主 — 佢等个上帝愛拯救佢等，
像牧人救羊群脫離危險。
佢等會在佢个土地上發光，
像冕旒頂个寶石一樣。
17佢等係樣般个靚 ！
有五榖使少年身體紮磳，
有新酒使少女容貌變靚。
Who We AreWhat We EelieveWhat We Do
2025 by iamachristian.org,Inc All rights reserved.
