1𠊎來為𠊎所親愛个唱一首歌，
一首有關𠊎所親愛个㧯佢个葡萄園：
在盡肥个山岡頂，
𠊎所親愛个開一垤葡萄園。
2佢挖鬆泥，拈掉石頭，
種品種優良个葡萄。
佢在園中起一座守望台，
又鑿一個醡酒池。
佢一心希望它會打當好个葡萄，
無想到打个葡萄品質當差。
3𠊎所親愛个就講：「耶路撒冷㧯猶大个人民啊，你等來為葡萄園㧯𠊎个事評理看仔。
4係毋係𠊎無照顧好勢？樣般𠊎希望它會打當好个葡萄，偏偏打當差个葡萄？
5「這下𠊎㧯你等講！𠊎愛恁樣來處理𠊎个葡萄園：𠊎愛拆掉籬笆，由在它荒廢，拆掉圍牆，由在走獸蹧踏它。
6𠊎愛由在它荒廢；無愛修剪葡萄藤，也毋挖鬆土地；𠊎愛俾地上生滿蒺藜㧯竻仔。𠊎甚至愛命令雲莫落水在園項。」
7 以色列就係上主 — 萬軍元帥个葡萄園；
猶大人民就係佢歡歡喜喜種个葡萄樹。
佢盼望佢等實行正義，
總係看到个係㓾人流血！
佢盼望佢等行為公正，
反轉逐所在有喊冤枉个聲！
人个壞行為8你等慘了！你等田連田、屋接屋，全部佔等自家用，毋肯留一個位所給別人。
9𠊎聽到上主 — 萬軍个元帥恁樣講：「這兜當大當靚个屋全部會荒掉，無人住。
10十公頃个葡萄園正榨出十公升个酒；十籃麥種收毋到一籃麥仔。」
11你等慘了！你等打早䟘起來就啉釅酒，啉到半夜醉天醉地。
12在酒席中，你等彈琴、彈瑟、打鼓、歕簫、啉酒，總係無關心也無尊重上主所做个。
13所以，𠊎个人民會因為無知被人捉走；佢等个領袖會餓死，人民會渴死。
14陰間會打開大嘴愛吞滅佢等，將在耶路撒冷歡樂中个尊貴人㧯人民全部吞掉去。
15逐個人全部會當見笑；尊貴㧯驕傲个人會降做卑微。
16上主 — 萬軍个元帥主持公義顯出自家个偉大；神聖个上帝用審判來顯出自家个神聖。
17該時，好額人个地會生滿野草，細羊仔在該位食草，就像在自家个草場，細山羊也會來該位尋食。
18你等慘了！你等已經被罪惡過犯落到了。
19你等講：「由在上主趕緊做佢愛做个；𠊎等想愛看佢个所做。由在以色列神聖个上帝實行佢个計劃；𠊎等想愛知佢个意念。」
20你等慘了！你等顛倒善惡，顛倒光暗，乜顛倒甜苦。
21你等慘了！你等還自家恅到有聰明智慧！
22你等慘了！你等拚酒逞英雄，調酒打頭名。
23你等被人收買，將壞人準做義人，反轉將義人个公義搶走。
24就像燥草被猛火燒掉，你等个根會爛掉，你等个花會像塵灰飛走；因為你等藐視以色列神聖上帝个法律，拒絕上主 — 萬軍元帥个教導。
25所以，上主愛向佢个子民大發譴；佢愛伸手來打佢等。山愛震動，屍體堆在街路，㧯垃圾共樣。雖然恁樣，上主个受氣還吂煞；佢還係愛擎手打佢等。
26上主愛搖大旗，呼召一個遠遠个國家 ；佢愛歕口哨對地極將佢等喊來。看啊，佢等會遽遽趕等來。
27佢等當中無𤸁个、無跌倒个、無啄痀个，也無睡目个。佢等个腰帶繫𢫮𢫮，鞋帶䌈好好。
28佢等个箭當利；佢等个弓拉𢫮。佢等个馬蹄比石頭還較硬；佢等戰車个輪仔像捲風轉恁轂。
29佢等大聲嘶，像獅仔盡吼，像細獅仔打到野獸啣等走，無人能救轉來。
30到該日，佢等會對以色列大聲嘶，像大海發出吼聲。你等看這垤土地！逐所在充滿烏暗㧯艱苦！光明被烏雲遮掉變暗了。
Who We AreWhat We EelieveWhat We Do
2025 by iamachristian.org,Inc All rights reserved.
