民數記 10 - 客語聖經 – 現代臺灣客語譯本，新舊約全書客語聖經 – 漢字版(THV12Hdb)-客家语

銀喇叭

1上主對摩西講：

2「你愛用銀仔打造兩支喇叭，用來召集民眾、也做得喊佢等徙營。

3兩支喇叭歕長聲个時，全會眾愛聚集在聖帳篷門前，在你个周圍。

4若係只有歕一支喇叭，以色列軍隊逐支族个領袖愛聚集到你个面前。

5若係歕出短短當急个聲，安營在東片个支族愛徙營。

6第二擺歕出短短當急个聲，安營在南片个支族愛徙營。所以，歕短短當急个聲係愛徙營个意思，

7歕長聲係愛聚集會眾。

8亞倫个子孫、做祭司个，愛歕這兩支喇叭。

「以下个條例，你等愛世世代代遵守。

9你等在自家个土地上堵到戰爭个時，為到保護自家、抵抗來攻打个敵人，你等愛用這兩支喇叭歕出戰爭个警報；𠊎 — 上主、你等个上帝就會紀念你等，救你等脫離仇敵。

10在歡樂个日仔，初一㧯其他个節期，獻燒化祭㧯平安祭个時，你等愛歕喇叭；𠊎就會紀念你等。𠊎係上主 — 你等个上帝。」

以色列人離開西奈曠野

11 以色列人離開埃及後第二年个二月二十，約櫃个聖帳篷頂高个雲升上去了。

12以色列人就開始佢等个路程，離開西奈曠野。雲來到巴蘭曠野，停在該位。

13佢等遵照上主給摩西个命令向前行，逐擺前進係照共樣个順序。

14猶大總隊个大旗帶頭出發，一隊一隊跈等向前行。亞米拿達个孻仔拿順𢱋猶大支族；

15蘇押个孻仔拿坦業𢱋以薩迦支族；

16希倫个孻仔以利押𢱋西布倫支族。

17聖帳篷拆下來以後，革順㧯米拉利兩宗族个人就扛等聖帳篷向前行。

18然後，呂便總隊个大旗就出發，一隊一隊跈等向前行。示丟珥个孻仔以利蓿𢱋呂便支族；

19蘇利沙代个孻仔示路蜜𢱋西緬支族；

20丟珥个孻仔以利雅薩𢱋迦得支族。

21然後，哥轄宗族个人扛等聖物跈等向前行。等佢等到新營地个時，聖帳篷已經重新搭起來了。

22再下去係以法蓮總隊个大旗出發，一隊一隊跈等向前行。亞米忽个孻仔以利沙瑪𢱋以法蓮支族；

23比大蓿个孻仔迦瑪列𢱋瑪拿西支族；

24基多尼个孻仔亞比但𢱋便雅憫支族。

25最後出發个係後衛隊但總隊个大旗，一隊一隊跈等向前行。亞米沙代个孻仔亞希以謝𢱋但支族；

26俄蘭个孻仔帕結𢱋亞設支族；

27以南个孻仔亞希拉𢱋拿弗他利支族。

28這就係以色列人徙營、一隊一隊向前行个順序。

29 摩西對佢个妻舅仔 — 米甸人流珥个孻仔 — 何巴講：「𠊎等愛到上主應許給𠊎等个地方去。佢識應許愛使以色列人強盛，所以跈𠊎等來去啊，𠊎等會俾你分享𠊎等个好處。」

30 何巴應講：「𠊎無愛去。𠊎愛轉𠊎个故鄉，𠊎自家人該位去。」

31 摩西講：「拜託毋好離開𠊎等。你對這曠野當熟，𠊎等應該在㖠位安營，你做得為𠊎等帶路。

32你若係㧯𠊎等共下去，𠊎等一定將上主賜給𠊎等所有个福氣㧯你共下分享。」

以色列人㧯約櫃向前行

33 以色列人離開上主个山，向前行三日。上主个約櫃一直在佢等个頭前，為佢等尋安營个所在。

34佢等對一個營地徙到另外一個營地；日時頭有上主个雲在佢等頂高。

35逐擺約櫃向前行，摩西就講：

「上主啊，求你䟘起來！

逐走你个仇敵，

使該兜恨你个人對你面前逃走！」

36逐擺約櫃停下來个時，摩西就講：

「上主啊，求你轉到以色列千萬人个當中！」