1𠊎係彼得，耶穌基督个使徒。𠊎寫信仔給上帝个選民，就係該兜分散在本都、加拉太、加帕多家、亞細亞、庇推尼各地方避難个人。
2你等受揀選係照阿爸上帝所預定个旨意，通過聖靈成做聖潔，來順服耶穌基督，被佢个血潔淨。
願上帝豐豐富富賜恩典、平安給你等！
生生个盼望3頌讚歸給𠊎等主耶穌基督个阿爸上帝！照佢个大慈悲，通過耶穌基督對死復活，佢將新个生命賜給𠊎等，使𠊎等有生个盼望，
4來承受上帝為佢个子民所保留該豐富个福份。佢為你等保留在天頂个福份係毋會敗壞，毋會打垃圾，也毋會消失。
5這個福份愛賜給你這兜因為信上帝蒙佢大能保守个人，使你等承受該已經準備好、在歷史个結尾愛實現个拯救。
6所以，你等愛大歡喜，雖然因為種種个試煉，你等這下可能暫時會有憂愁。
7這係愛證明你等確實有堅定个信心。會消滅个金仔，還用火來煉；你等个信心比金仔過較貴重，當然還較愛受考驗來堅定，使你等在耶穌基督顯現該日得到稱讚、光榮，㧯尊貴。
8你等雖然無見過佢，總係敬愛佢；雖然這下看佢毋到，還係信靠佢。所以，你等就有無法度表達該種滿有榮光个歡喜，
9因為你等這下領受信心个效果，就係你等靈魂个得救。
10論到這拯救，眾先知早就詳細查考研究過了，佢等識預言上帝所愛賜給你等个恩典。
11佢等查考，愛知基督个靈在佢等底背所指示个，就係「基督定著愛受苦，後來一定會得到榮光」這個預言，會在麼介時節，㖠種情形之下來實現 。
12上帝啟示眾先知，俾佢等知，佢等个工作並毋係為自家，係為你等。佢等所講个這兜事，這下已經通過福音个使者，倚靠對天頂來个聖靈，傳給你等了；這兜事，連天使乜盡想愛查看！
聖潔个生活13所以，你等个心愛準備好勢；愛警醒，專心盼望耶穌基督顯現該時所愛賜給你等个恩典。
14愛做聽從上帝个子女，毋好被私慾轄制，像你等頭擺戇檔無智識个時節恁樣。
15呼召你等个上帝係聖潔个；你等也定著愛在一切所做个事上聖潔；
16因為聖經講：「你等愛聖潔，因為𠊎係聖潔个。」
17你等祈禱个時，喊該照人个行為、用共樣个標準來審判人个上帝做阿爸；恁樣，你等在世間做旅客个日仔就應該愛敬畏佢。
18因為你等知，你等對祖先所傳个、會敗壞个生命中得到釋放，所付上个代價係麼介。並毋係像金銀這兜會敗壞个東西，
19係基督寶貴个血；佢係像獻祭所用、無缺點無垃圾个羔羊一樣。
20在世界創造以前，上帝已經先揀選基督，愛佢在這歷史个末期為你等來顯現。
21通過佢，你等相信該使佢對死復活、又賜佢榮耀个上帝；因為恁樣，你等个信心㧯盼望係釘根在上帝个底背。
22這下，因為聽從真理，你等已經使自家成做潔淨个人，又真實愛兄弟姊妹，就應當對心底彼此熱誠相惜。
23因為你等得到重生，毋係對該會敗壞个種子生出來个，係對該毋會敗壞个種子，就係上帝有生命、長存个道理來个。
24像聖經所講：
逐個人攏總像野草共樣，
佢等个榮華全部像野花；
草會枯燥，花會謝掉，
25總係主个道永遠長存！
這道就係該傳給你等个福音。
Who We AreWhat We EelieveWhat We Do
2025 by iamachristian.org,Inc All rights reserved.
